ORANJESTAD (AAN): Diabierna mainta te den oranan di merdia, Corte den Promer Instancia a trata e caso penal cu Ministerio Publico a cuminsa contra un grupo di 5 persona. Den e grupo aki tin un mucha homber Chines, L., menor di edad mientras cu e otronan nan edad ta varia entre 18 y 25 aña.
Ta asina cu e caso contra e mucha a wordo trata cu portanan sera y por a mira e famia Chines presente. Despues a trata e caso contra e hobennan homber: J.B. (18), J.R. (25), F.T.(18) y R.M.(19). Fiscal a baha pisa riba e grupo di hobennan caminda el a exigi entre 3 aña y 12 aña di prison pa 5 asalto arma. Den e articulo aki DIARIO ta concentra riba e tratamento di e caso y exigencia di Fiscal. Den un otro articulo ta publica e defensa cu ta haya e castigo exigi exagera y ta pidi Hues aplica e ley hubenil pa e hobennan aki.
SERIE DI ASALTO ARMA
Fiscal ta acusa e grupo aki cu riba 25 di Maart 2021 a haci dos asalto arma tras di otro riba dos snack truck. Riba 23 Februari 2021 a haci asalto arma riba Sun Flower Supermarket. Dia 11 di Maart 2021 a haci asalto arma na Super Clean Laundry, dia 9 Februari 2021 a haci asalto arma riba New Star Supermarket.
VIOLENCIA DURANTE ASALTO
Hues a mustra cu durante e asalto arma na New Star Supermarket riba hende den e supermercado a resulta herida. E asaltantenan a bay cu e caha di placa. Ta asina cu e asaltantenan a admiti.
DOS SOSPECHOSO TA NENGA DI A HACI ASALTO
Hues a mustra riba e asalto arma na Sun Flower Supermarket riba 23 Februari 2021, caminda un Chines a wordo maltrata. Ta asina cu solamente J.R. ta desmenti categoricamente. El a bisa Hues cu e no a participa na ningun di e asaltonan. Hues a remarca cu e otronan si a bisa cu J.R. tabata envolvi. El a bisa cu e ta nobato den e grupo y no sa pakico nan ta bisa cu e ta envolvi.
Pa loke ta e asalto arma na Super Clean Laundry riba 11 Maart 2021, J.M. a desmenti di a participa na asalto arma aki. Hues a bisa cu por a compronde cu J.M. a rabia pasobra e no a participa den e asalto. J.M. a bisa cu el a rabia pasobra el a bisa nan pa no haci’e pasobra e lo ta e promer sospechoso door cu e ta biba cerca di e Laundry. F.T. a admiti di tabata arma y a core tras di un Chines y bise drumi na suela.
Pa loke ta e dos asaltonan na e dos snack truck, J.B. a bisa cu el a fia e revolver Caliber 38 di F.T. y a bay hunto cu e Chines L.
Fiscal a bisa cu J.R. ta blo nenga pero tin hende a reconoce.
RECLASSERING
Hues a mustra cu e raport di Reclassering ta mustra cu e grupo aki tabata den e mesun circulo esta no a caba school, usa droga, anda cu mal amigo, no ta traha. Reclassering ta haya cu e chens ta grandi cu nan lo bolbe haci algo asina, si nan no haya guia. J.R. a bisa Hues cu e no ta tin problema cu usa droga y lo kier Reclassering yud’e haya trabao. Tur e sospechosonan ta desea di haya ayudo di Reclassering.
FISCAL
Fiscal a cuminsa bisa Hues cu entre Februari 2021 y Maart 2021 Aruba a wordo sacudi cu un serie di asalto. Danki na bon trabao di Polis y Recherche, a gara e grupo aki. El a mustra cu dia 22 Maart 2021 dos snack truck a wordo asalta. Segun declaracion di e doñonan di e snack truck, un di e asaltantenan tabata e mucha Chines L. cu tabatin un cuchiu grandi y un otro cu arma. Tabatin un otro para mas leu. E asaltonan aki a sosode net ora tabata serando e snack truck. Investigacion a conduci na detencion di e Chines L. y J.B. E mucha Chines L. a declara na Polis cu den e promer asalto a haya 200 florin y pesey a dicidi di haci un otro. April 2021 a detene F.T. y el a bisa cu el a fia J.B. e arma. Na opinion di Fiscal, tin indicacion cu J.R. tambe a haci e dos asaltonan. Tin testigonan cu a reconoce di a haci asalto. Fiscal ta haya cu F.T tambe ta complice door cu el a fia su arma na J.B. y tabata sa cu ta asalto ta bay haci.
Fiscal a menciona e otro asaltonan na Februari 2021 cu J.B., F.T., R.M. y J.R. tabata envolvi. El a bisa cu riba camera di seguridad por a mira nan. 11 Maart 2021 e asalto na Super Clean Laundy, tabata J.B., F.T. y J.R. Fiscal a bisa cu R.M. no tin prueba suficiente pa ta complice di e asalto aki y ta pidi Hues pa declar’e liber di esaki.
CASTIGO
Fiscal a bisa Hues cu un grupo di hoben a haci 5 asalto arma cu ta hopi serio. Tabatin asalto caminda a usa violencia. Esakinan ta daña imagen di Aruba como destinacion turistico. Fiscal a tuma nan na malo cu durante e pandemia di Corona ta haci esakinan. Esaki a causa hopi tension den comunidad.
Fiscal a exigi pa R.M. 3 aña y 4 luna di prison di cual 6 luna ta condicional cu 3 aña di prueba. Pa F.T., Fiscal a exigi 9 aña di prison. Pa J.R., kende segun Fiscal ta blo desmenti, el a exigi 11 aña di prison y pa J.B., 12 aña di prison.
Hues, despues di a scucha e defensa di e abogado, a sera tratamento di e caso y a bisa cu dia 22 October 2021 lo tin sentencia.
