ORANJESTAD (AAN): E homber C.C.(21) a scucha Hues confirma exigencia di Fiscal, kendenan a hay’e culpable
di a choca su mesun mama y a hinca un homber bisiña cu cuchio. Hues a hala C.C. su atencion cu si e no comporta su mes durante e periodo di prueba, e lo bay sera pa sinta e castigo condicional.
E acusacionnan cu Fiscal a presenta contra C.C. ta cu riba 1 di Mei 2021, el a hinca e homber M. varios biaha cu un cuchio na su lomba. Tambe e ta wordo acusa di a choca su mesun mama riba 9 Augustus 2019 y kibra su television.
CHOCA SU MAMA
Hues a puntra C.C. kico a pasa cu su mama. Segun C.C. e tabatin discusion cu su mama pero ningun momento el a maltrata su mama. C.C. a bisa cu su mama a bisa cu C.C. no a maltrat’e. Hues a bisa cu segun e mama su declaracion na Polis, C.C. ta huma marihuana desde cu e tin 14 aña y tin rabia riba su famia. E mama a bisa cu dia 9 Augustus 2019, C.C. a lanta di remate. Merdia sinta na mesa cu e otro rumannan y mama el a reclama cu ta laf. El a lanta bay for di mesa y coy television di su mama bay cun’e den su camber. El a bisa cu e lo traha spaar placa cumpra un gun pa tira tur mata. E mama a bay busca su television y C.C. a dal e pantaya kibra. Despues el a choca su mama y kier a bent’e for di trapi. E ruman muher di C.C. a bisa cu C.C. tabata fastioso y su mama tabata purba calm’e. Tabatin discusion entre C.C. y mama den camber di C.C. El a bay den camber y mira C.C. chocando su mama riba vloer. El a kita C.C. y yama Polis. Hues a mustra cu C.C. na Polis no kier duna declaracion. El a bisa cu e kier mira su mama pa pidi’e sorry, brase y dun’e sunchi.
HINCA HOMBER
Na Mei 2021 segun C.C. el a defende su mes contra su bisiña M. Segun C.C., el a mira M. bay riba dje cu un cuchiu. Segun C.C., M. tabata jaloers cu C.C. lo a papia cu su partner. Hues a mustra cu segun M., e tabata den cura di bisiña y C.C. a bay huma y tabata falta respet. E tabata su cu lomba contra cura. E momento ey, el a sinti algo hinca y ta C.C. a hink’e. M. a lucha cun’e y e bisiña rasta a yud’e pa kita e cuchio for di C.C. Despues C.C. a core bay. Segun C.C. e cos no a sosode asina. Hues a bisa cu M. a bay hospital pa tratamento. Dokter a constata cu M. tin un hinca patras na lomba. Segun C.C., el a hisa M. benta abao y e ora ey M. lo a hinca su mes. Hues a remarca cu e caminda cu M. ta hinca, ta dificil pa M. a hinca su mes. Hues a sigui bisa cu den cura di e bisiña Polis a haya un cuchio benta abao pero no sa si esey ta e cuchio cu a usa pa hinca M. Hues a mustra cu e bisiña rasta a bisa cu e tabata cu M. den su cura y na dado momento C.C. a bin. M. y C.C. tabata papia. Na dado momento el a mira C.C. a bay su cas y sali cu algo den man y a bay bringa cu M. C.C. lo tabata dal M. diferente biaha na su lomba. El a bay para e pelea y despues a haya un cuchio benta abao. Segun C.C., e rasta ta gaña riba dje.
Ta asina cu C.C. no ta bibando serca su mama mas. Segun C.C.. e tin algo mas di un luna ta bibando cerca su primo. C.C. a bisa Hues cu e kier bay Hulanda y tin famia aya pa e bay studia. Hues a mustra cu na 2017, C.C. a wordo condena pa maltrato. Reclassering a mustra cu C.C. no a cumpli cu guia y cu na cas e ta maltrata su famia. E chens ta grandi cu e por bolbe haci e delitonan. Fiscal a puntra C.C. si e ta dispuesto pa sigui guia di Reclassering y C.C. a bisa cu awor si e lo haci’e.
EXIGENCIA DI FISCAL
Fiscal a bisa cu e ta haya legalmente proba e acusacionnan contra C.C. Tin relato di hospital cu ta mustra cu M. a wordo hinca y tin e rasta cu a mira cu C.C. a hinca M. Na opinion di Fiscal, ta solamente C.C. ta papia di a defende su mes. Fiscal a bisa Hues cu e no ta kere C.C. cu ta bisa cu ta M. a hinca su mes. Fiscal a sigui bisa cu C.C. a choca su mama y kibra pantaya di television. Su ruman muher a mira esaki sosode. Fiscal ta haya cu mester tene cuenta cu seriedad di casonan y ta considera C.C. un residivista di maltrato. Tambe Fiscal a tene cuenta cu raport di Reclassering. Fiscal a bisa cu pa cu e castigo, e ta tene cuenta cu edad hoben di C.C. El a exigi 120 dia di prison di cual 100 dia ta condicional cu 2 aña di prueba y bou guia di Reclassering. El a exigi tambe pa destrui e cuchio.
Abogadonan a mustra cu C.C. no a lanta den bon ambiente. Hasta a mustra cu e lo tabata victima di abuso y a keda den e mesun ambiente. Ademas e ta usa droga cual no ta sano. E ta dispuesto pa haya guia.
SENTENCIA
Hues despues di a scucha e abogadonan a sera tratamento di e caso y a dicta sentencia di biaha. Hues ta haya legalmente proba cu C.C. a kibra e pantaya di television y choca su mama. Tambe e ta haya legalmente proba cu C.C. a hinca M. cu cuchio. Pa cu e castigo, Hues a bisa cu e ta tene cuenta cu C.C. a yega di haya castigo pa maltrato.
Hues a remarca cu un hende cu ta maltrata su propio mama no tin nada pa want’e di maltrata otro hende. Hues a confirma exigencia di Fiscal. El a condena C.C. na 120 dia di prison di cual 100 dia ta condicional cu 2 aña di prueba. Hues a hala C.C. su atencion cu si e no comporta su mes y haci cualkier delito e lo mester bay cera 100 dia. Hues a bisa C.C. cu e mester sigui guia di Reclassering. El a ordena pa e cuchio wordo destrui.
