Security Video a demostra net lo contrario! - ORANJESTAD (AAN): Un interesante caso penal a sosode Diahuebs mainta den sala di Corte di Husticia.
Un homber acusa di a purba mata un agente di Polis door di manda auto riba dje cu velocidad halto y resisti contra su detencion, a worde declara liber.
PURBA MATA POLIS CU AUTO:
Diahuebs mainta e sospechoso J.G. y tampoco cu abogado a presenta den sala di Corte di Husticia pa e caso penal cu Ministerio Publico a cuminsa contra dje. Hues a analisa si e invitacion haci na J.G. tabata haci na tempo y despues a dicidi cu ta trata e caso pasobra tur cos ta na orden.
E acusacionnan cu Fiscal a presenta den sala di Corte ta cu J.G. riba 6 di Mei 2021 a purba mata un agente di Polis door di manda auto riba dje cu velocidad halto. Tambe J.G. ta worde acusa di a resisti contra su detencion e mesun dia ey.
NO TIN PRUEBA CONVINCENTE:
Fiscal a hay’e confronta cu e situacion cu tin e procesverbaal di Polis contra e imagen di video y declaracion di testigonan. Fiscal a bisa cu apesar cu e tin procesverbaal di e dos agentenan di Polis, cu ta bisa cu J.G. a manda auto riba un di e agentenan y despues a resisti su detencion e no tin prueba convicente.
Pero Fiscal a mustra cu ora el a mira e imagen di video di seguridad, e no ta mira cu J.G. a manda e auto literalmente riba e agente di Polis cu velocidad y tampoco e ta mira cu e agente a bula un banda pa scapa su bida. Ademas tin declaracion di 3 testigo.
Fiscal a sigui bisa cu mesun cos e ta mira riba e video cu no tabatin resistencia di parti di J.G. contra su detencion.
SOSPECHOSO DECLARA LIBER:
Fiscal a bisa Hues cu e no ta haya cu tin prueba convicente y pesey e ta pidi pa declara J.G. liber di tur dos acusacion.
Hues a sera tratamento di e caso y a dicta sentencia di biaha. Hues a bisa cu e tambe a mira e video y enberdad e no ta mira cu J.G. a core cu velocidad halto y ni cu e agente di Polis mester a bula un banda. Tampoco Hues a mira cu J.G. a resisti contra su detencion.
Hues a confirma e peticion di Fiscal. Hues a declara J.G. liber di tur dos acusacion.
