ORANJESTAD (AAN)– Fiscal a baha pisa riba un grupo di 10 persona, di cual e mayoria ta Venezolano ilegal, cu a haci un cantidad di asaltonan arma na cas di famianan.
No solamente nan tabata menaza cu arma, sino tambe tabata bati hende den nan propio cas, pa nan haya placa. E castigonan cu Fiscal a exigi ta entre 16 y 5 aña di prison. Fiscal ta haya cu mester manda un señal bon cla cu no ta tolera asalto arma cu violencia na cas di famia.
Tratamento di e caso aki a dura practicamente henter un dia. Parti mainta a dedica pa tratamento di e casonan di asalto y merdia a sigui cu e rekisitorio di Fiscal y defensa di abogadonan.
DIARIO den e articulo aki ta concentra riba e reaccion di Fiscal pa cu e grupo aki y den un otro articulo lo bay publica e asaltonan arma cu violencia cu e grupo aki a haci. Por cierto, un miembro di e grupo aki tabata forma parti di un otro grupo cu a haci un asalto arma brutal riba un supermercado Chines, caminda el a maltrata e Chines formal door di dal’e diferente biaha cu e arma na su cabez.
E caso grandi aki ta hiba e nomber Falcon. Tin un parti (3) di e acusadonan cu a keda KIA door di espacio y teniendo cuenta cu e medidanan di Covid den sala di Corte, mientras cu e resto tabata den sala di Corte di Husticia di Aruba.
E sospechosonan ta: Dos ruman Venezolano J.V.V. y C.V.V., e Venezolano A.D.B., e dama Venezolano muher C.A.W., e Venezolano J.P.B., e Venezolano F.B.R., e Arubiano W.N.V., e Venezolano M.G.A., e Arubiano D.J.R. y e Venezolano F.M.S.
7 ASALTO DEN 3 LUNA
Fiscal a bisa Hues cu e grupo aki a haci 7 asalto arma cu violencia den un periodo di 3 luna. Ta asina cu no ta tur a participa na tur e asaltonan y pesey Fiscal a haci acusacion contra cada un separa pa mustra kico tur cada un a haci.
MENAZA Y BATI VICTIMANAN
Fiscal a mustra cu e grupo aki tabata drenta cas di famia, menaza hende cu arma caminda tabata pone e arma na cabez di hende, dal y skop hende. Tabatin caso caminda mucha chikito a mira con e asaltantenan aki tabata bati nan mayornan.
VIOLA PRIVACIDAD DI HENDE
Fiscal a condena e hecho cu e famianan a pasa tur e trauma aki den nan propio cas. Nan cas caminda nan mester sinti nan mes sigur. El a mustra cu hasta muchanan den cas, e asaltantenan a pone paña rond di nan cabez. Fiscal ta haya cu esaki ta un violacion di privacidad di hende.
NO TA TOLERA ASALTO ARMA
Fiscal ta haya cu mester manda un señal bon cla den comunidad cu no ta tolera asalto arma, den ningun forma na Aruba. El a bisa cu e grupo aki a haci e asaltonan arma, puramente pa haya placa.
EXIGI CASTIGO PISA
Fiscal a exigi 16 aña di prison pa M.A.G.A., kende ta esun cu tambe a haci asalto arma cu un otro grupo y a bati un Chines di edad. Fiscal tambe a exigi 16 aña di prison pa: A.J.D.B., J.L.P.B. y J.C.V.V.
Fiscal a exigi 15 aña di prison pa D.J.R., 12 aña di prison pa e dama C.A.W., 10 aña di prison pa C.J.V.V., 6 aña di prison pa W.S.N.V. y F.J.B.R., 5 aña di prison pa F.R.M.S.
Despues di a scucha e defensa di e abogadonan, Hues a sera tratamento di e caso y dentro di algun siman lo por spera sentencia.
