ORANJESTAD (AAN): Diahuebs mainta Hues di Corte den Promer Instancia a tuma e homber J.R. na malo pa e forma con e tabata huur cuarto cu hendenan ilegal.
Hues a condena J.R. na castigo combina. E acusacion contra J.R. ta cu entre Juli 2017 pa Maart 2018 el a trafica ilegalnan di Venezuela.
EXIGENCIA DI FISCAL:
Luna pasa tratamento di e caso a tuma lugar caminda Fiscal a bisa Hues cu e ta haya legalmente proba cu J.R. ta culpable di traficacion di hende. El a bisa cu a base di sospecho di droga, Polis a drenta un cas y haya 50 Venezolano ilegal den e cas.
Pa un matras tabata paga 200 Dollar pa luna pa keda den e cas den Emmastraat. Investigacion a mustra cu e acusado J.R. tabata huur e cas for di un Chines. Fiscal a mustra cu e hendenan ilegal a bisa cu J.R. tabata sa cu nan ta ilegal y e tabata busca nan. Na opinion di Fiscal, J.R. tabata haci esey a base di ley ta traficacion di hende pa gana placa. Esaki ta un caso hopi serio. E hendenan aki ta huy for di Venezuela pa haya un mihor bida.
Fiscal a tuma J.R. hopi na malo cu J.R. tabata saca probecho di e grupo di hende aki. Pa cada matras tabata paga 200 Dollar o sea pa luna J.R. tabata gana 10 mil Dollar. Di esaki e ta paga 7 mil Florin pa huur. Na opinion di Fiscal, esey ta mustra cu J.R. tabata gana 10 mil Florin pa luna. Ta un gran cantidad di placa e tabata gana. Fiscal a anuncia cu lo bay cuminsa caso pa kita propiedadnan cu J.R. a gana door di e forma di huur aki.
Pa loke ta e caso aki mes, Fiscal a bisa cu tabata e intension di exigi 10 luna di prison. Actual tin e situacion cu KIA ta yen. E tabata 26 dia sera. Fiscal a exigi 146 dia di prison di cual 120 dia ta condicional. Esey ta nifica cu J.R. no mester bay sera. Ademas Fiscal a exigi pa J.R. haci 240 ora di trabao of 4 luna di prison. El a enfatisa cu J.R. por spera e caso pa kita tur loke el a gana.
SENTENCIA:
Hues a rechaza defensa di abogado cu acusado J.R. no tabata sa cu e hendenan ilegal. Hues a bisa cu J.R. tabata huur e lugar na hendenan cu tabata bin ilegal. E mes tabata bay busca nan. Hues a remarca cu ta increibel cu J.R. tabata huur 1 matras so pa 200 Dollar pa luna pa hende. Hues ta haya J.R. culpable di traficacion di hende.
Hues a tuma J.R. na malo cu pa 1 matras ta huur 200 Dollar. Hopi hende tabata kedando den e lugar y cada un mester paga 200 Dollar.
Pa cu e castigo, Hues a bisa cu door cu caso bie, e ta condena J.R. na 120 dia di prison di cual 94 dia ta condicional cu 2 aña di prueba. Tambe Hues a condena J.R. na 120 ora trabao of 60 dia prison
.
