ORANJESTAD (AAN) – Diahuebs mainta e homber L. a presenta den Corte pa e caso penal cu Ministerio Publico a cuminsa contra dje.
Durante tratamento di e caso, tabatin un momento cu L. a cuminsa yora ora cu representante di Censo a presenta e demanda di daño.
E representante a bisa Hues cu L. tabata un tremendo empleado y loke a sosode a shock henter Censo. Fiscal a haya L. culpable y a exigi trabao pa comunidad y pa pone medida di pago pa L. paga bek 50 mil florin na Censo. Segun ley penal, esey ta e suma maximo cu por demanda.
MALVERSA PLACA DI CENSO
E acusacion cu Fiscal a presenta contra L. ta cu durante 1 April 2018 y Januari 2019, el a malversa placa na Censo.
Ta asina cu L. a admiti. Hues a puntra pakico L. a haci’e. Segun L. e tabatin debenan y su entrada no tabata suficiente. Ora cu na 1 April 2018 e hefe di control no tabata bin mas, el a tuma e chens. L. a bisa Hues cu su pensamento tabata pone placa bek. E tabata usa e placanan cu e tabata coy for di Censo pa gamble den casino pero no a gana placa. A sigui asina pa basta tempo. Te na 2019 a bin otro persona cu a controla y a constata cu L. a malversa mas cu 61 mil florin.
Hues a puntra L., pakico a bay gamble. Segun L. e tabata gamble pa asina gana placa pa paga su debenan. Hues a remarca cu esey ta un pensamento no logico pasobra ta conoci cu gamble no ta sigur cu ta gana. Hopi ta perde hopi placa. Si tabatin hopi ganador no tin gamblemento mas.
Segun L. ora el a wordo gara, el a bay un psicologo. Ta asina cu L. a wordo kita September 2019 for di Censo. Despues a bin pandemia pero no a haya trabao. E aña aki el a logra haya un contract pa trabao. E tabata keda cerca su mama, kende tabata yud’e. Su debenan tabata para pendiente e caso aki. Hues a bisa cu Censo awor tambe ta demanda pa L. paga bek. Abogado mr. Emerencia a puntra si L. ta kere cu e ta adicto na gamble. El a bisa cu si. El a bisa di ta dispuesto pa haya guia riba esaki.
DEMANDA
Censo a demanda 61,615 florin. E representante di Censo a bisa cu nan a keda den shock cu esaki. L. tabata un hopi bon empleado. El a abusa di a confianza cu a pone den dje. Por a nota cu L. a cuminsa yora. Fiscal ta spera cu L. realisa cu su adiccion na gamble a perhudik'e.
FISCAL
Fiscal a bisa cu e por a ripara cu e caso ta traha hopi riba L., kende a cuminsa yora. Fiscal a bisa Hues cu e ta spera cu L. realisa cu su adiccion na gamble a perhudike. Fiscal a bisa cu ta hopi placa a malversa di comunidad. El a remarca cu e problemanan financiero no a pasa ainda. E placa cu a malversa mester paga bek. Awor a scucha cu L. tin trabao. E ta haya cu L. mester di tratamento pa su adiccion. Na opinion di Fiscal, mester manda señal bon cla cu esaki no por. Si ta horta placa di Gobierno, tin castigo pisa.
Fiscal a exigi 6 luna di prison condicional cu 3 aña di prueba. Banda di esey, Fiscal a exigi 200 ora di trabou pa comunidad pa L. Pa loke ta e demanda di Censo, Fiscal ta haya cu por aproba 50 mil florin segun ley. El a exigi pa pone e medida di pago of 1 aña di prison. El a bisa cu e resto di e mas cu 61 mil florin, Censo lo por demanda den un caso Civil.
ABOGADO
Mr. Emerencia ta haya cu L. ta un adicto na gamble. El a bisa Hues cu L. tabatin e pensamento cu e lo gana den casino y lo paga tur cos. E no tabata realisa cu e debe tabata bira mas grandi. El a bisa Hues cu awor L. ta hayando tratamento pa su adiccion di gamble. El a mustra cu L. tabata den e circulo vicioso caminda ora e placa tabata caba den casino, e tabata bay coy mas placa na Censo, cruza caminda y bay sigui gamble pasobra e kier gana. For di 2012, L. tabata trahando tremendo na Censo. Ta duel L. masha cu el a defrauda empleadonan di Censo. El a pidi disculpa pa loke el a haci. Na opinion di abogado, L. ta conciente cu loke el a haci no ta bon. E ta conciente cu e mester paga bek. E abogado ta haya cu via Reclassering lo por yuda L. paga su debenan. E lo mester paga un instancia e placa cual instancia lo reparti esaki na tur esnan cu L. debe. Mr. Emerencia ta haya cu e medida di pago exigi pa Fiscal, ta hopi pisa y tambe e trabou pa comunidad. El a mustra cu awor L. mester traha pa gana placa. Esey ta haci hopi dificil pa e por bay haci trabao pa comunidad. E abogado ta kere cu L. a siña su les.
Hues a sera tratamento di e caso y dia 25 November 2021 lo tin sentencia.
