Fiscal kier haci un interogacion mas cu Weert --- ORANJESTAD (AAN): Ayera merdia 2’or via video conference Hues di Corte den Promer Instancia a atende pa di dos biaha e caso penal pro forma contra e sospechoso Rudy “Elvis” Weert.
E promer biaha tabata na Augustus 2021 caminda a palabra cu mester haci mas investigacion y cu ayera atrobe lo ta pro forma.
E sospechoso Weert tabata den un oficina na KIA mientras cu den sala di Corte tabata presente Hues, Fiscal y abogado mr. Mohamed. Via un screen grandi den sala di Corte tabata mira otro.
VIOLA MUCHA
Na Augustus 2021, Fiscal a mustra cu e promer acusacion ta cu entre 19 Maart 2005 te cu 1 Maart 2009, Weert door di usa menaza y violencia, a viola e mucha G. E tempo ey G., tabatin 14 aña y tabata bou cuido di Weert. Fiscal a menciona cu Weert ta wordo sospecha di a mishi na e mucha su pechonan, su parti intimo y a tene relacion sexual cu e mucha. Esaki lo tabata sosode den un apartamento scondi.
ACTONAN INMORAL
Fiscal a sigui bisa cu e otro acusacion contra Weert ta cu entre 19 Maart 2005 te cu 18 Maart 2007, el a haci actonan inmoral cu e mucha G. cu tabata bou di su cuido. E mucha e tempo ey no tabatin 16 aña ainda. Fiscal a bisa cu Weert lo a mishi na partinan intimo di e mucha y a hasta tene relacion sexual cun’e.
Fiscal a bisa cu e mesun cos lo a sosode tambe entre 19 Maart 2007 te cu 1 Maart 2009.
MALTRATO SEVERO CU A CAUSA MISKRAAM
Fiscal tambe ta acusa Weert cu entre 19 Maart 2006 y 19 Maart 2009, intencional y premedita, a maltrata e hoben G.(18) cu consecuencia cu el a sufri un miskraam. Fiscal ta mustra cu Weert lo a hinca un hangua of algo skerpi na e parti intimo di G. cu consecuencia cu el a sufri un miskraam.
FALTA MAS INVESTIGACION
Ayera merdia Fiscal a bisa Hues cu e kier haci un interogacion mas cu Weert pa e ora ey tin e procesverbaal oficial cla. E ta kere cu awor por fiha un fecha pa tratamento di e caso.
CASO PENAL OTRO AÑA
Hues a bay di acuerdo cu e peticion di Fiscal y a fiha dia 28 di Januari 2022 pa 8.30 di mainta lo trata e caso penal contra Weert. E dia ey Weert lo wordo hiba sala di Corte pa e presenta dilanti Hues.
