Cuater sospechoso lo presenta dilanti Hues --- ORANJESTAD (AAN) – E sospechosonan Wuill Vrolijk, Joshua Wouters, Yael Frans y Brandon Wouters, Diabierna mainta 5 December 2021,
lo presenta dilanti Hues pa tratamento di e lamentable asesinato cruel na Pos Chiquito. E grupo aki ta wordo sospecha di a tira mata Lisander Leonardo Ignacio.
Na Juli 2021 tabatin un caso pro forma, cual a wordo trata via video conference. E sospechosonan tabata den KIA mientras cu Hues, Fiscal y abogadonan tabata den sala di Corte di Husticia.
E acusacion cu Fiscal a presenta ta cu riba 15 di Januari 2021, intencionalmente cu cara tapa y na un manera calmo, nan a tira e difunto Ignacio, cu a resulta fatal. Ta asina cu e victima tabata sinta den un auto den cura di e cas na Pos Chiquito.
Fiscal a bisa cu Wuill, Joshua y Yael a yega na e cas cu caranan tapa y a los tres tiro riba e defunto Ignacio. Dos tiro a alcanza e victima den cabez, cu consecuencia cu el a fayece. E dia ey Fiscal no a menciona Brandon. Tambe Fiscal ta acusa e trio aki di posesion di arma di candela.
Ta asina cu Hues di Corte di Husticia a fiha mañan 5 December 2021 pa trata e caso y a aparta henter e mainta pa e caso aki. Durante tratamento di e caso lo bay haya sa kico tur a sosode riba 15 Januari 2021 y kico tabata e motibo cu a asesina Ignacio na un forma cruel asina.
DIARIO lo informa lectornan kico tur a pasa den sala di Corte di Husticia di Aruba.
