ORANJESTAD (AAN): Diahuebs mainta e homber C.M.(24) y J.P. (20) a presenta dilanti Hues pa e caso penal cu Fiscal di Ministerio Publico a cuminsa contra nan.
Nan ta wordo acusa cu riba 7 November 2021 a menaza dos agente di Polis cu morto. Tur cos ta desmenti esey y a bisa cu e agentenan a boeinan y despues a maltrata nan. E acusado J.P. a hasta bisa Hues cu e lo bay denuncia e agentenan cu kier a abusa di dje. Hues no a kere e dos acusadonan y a bisa cu e ta bay tras di e relato di Polis, kendenan a hura di ta traha corecto.
Den e articulo aki DIARIO ta concentra riba e denuncia di J.P.(20) contra e dos agentenan di Polis y den un otro articulo ta publico e caso di menaza.
Segun J.P., e agentenan ora tabata hib’e cel lo a purba hinca algo den su atras. E ta considera nan pro pedofile. El a bisa emociona cu e lo bay haci denuncia. Hues a remarca pakico nan lo haci esaki. Segun J.P., nan tabata burachi y tabata haci fastioso. El a bisa cu nan a boei e y lanta su man na halto y dal’e. Despues nan a purba hinca un clob of mobilefoon den su atras.
Hues a bisa cu segun relato, C.M. y J.P. tabata burachi y tabata haci fastioso. E no ta mira pakico e agentenan di Polis ta bay gaña den e relato.
Ta asina cu despues cu abogado mr. Emerencia a hiba su defensa, Hues a dicta sentencia di biaha. Hues a bisa cu e agentenan di Polis a traha e relato bou juramento y e no ta mira motibo pa duda den loke nan a pone. Di e forma aki Hues a bari e acusacion di J.P. for di mesa.
Den un otro articulo DIARIO ta publica e sentencia contra e duo aki.
