ORANJESTAD (AAN) – Diahuebs mainta dos agente di Recherche, d M. y D. a presenta den Corte pa e caso penal cu Ministerio Publico a cuminsa contra nan.
Tabatin un discusion hopi largo entre abogadonan mr. Lejuez, mr. Illes y Fiscal. Ta asina cu e Fiscal a bin for di Curacao special pa atende cu e caso aki. Esey ta pa mustra imparcialidad di parti di Ministerio Publico ya cu e Fiscalnan conoce e dos agentenan.
ACUSACIONNAN
E acusacionnan cu tin contra e dos agentenan ta:
- ladronicia di un cellular entre 1 April 2018 y 1 November 2018.
- Nan ta wordo acusa di pasa informacion confidencial di Polis via WhatsApp na un persona entre 12 Augustus 2018 y 1 November 2018.
- Tambe ta acusa nan di a tuma servicio of regalo for di e persona aki entre 1 April 2018 y 1 November 2018.
- Tambe nan ta wordo acusa di a haci mal uso di nan autoridad como Polis door di tuma informacion di un ciudadano criminal sin autorizacion of permiso entre 1 April 2018 y 1 November 2018.
CASO REGIEZITTING
Hues a mustra cu e hecho cu e abogadonan tin deseo pa haci investigacion, lo considera un “regie zitting” apesar cu Ministerio Publico ta reclama cu esey no por mas pasobra e partidonan a bay di acuerdo pa trata e caso. Hues a splica cu el a hala atencion di Ministerio Publico pa e caso aki pasobra promer e no a ricibi ningun documento di e caso, solamente e dos nombernan. Despues di insistencia, Hues kende tabata cla pa kita e caso for di schedule, a haya e documentonan di e caso.
FISCAL A RECLAMA
Fiscal a bisa Hues a bisa cu enberdad Hues no ta perde e autordad pa determina un regie zitting. Sinembargo el a reclama e hecho cu un dia promer cu e caso, e ta haya peticion di abogadonan pa mas investigacion. E Fiscal a mustra cu el a prepara e caso pa trata ayera mainta, manera tabata planea. Fiscal a splica cu for di Februari 2021 a puntra e abogadonan si tin deseo pa mas investigacion. Na Maart 2021, el a tende di e abogado cu nan no kier mas investigacion. Despues cu tabata planea cu lo bay trata e caso, un dia promer ta haya sa cu abogadonan kier mas investigacion. Fiscal ta haya esaki ta contra e stipulacion den e proceso. E proceso stipula segun ley ta cu 3 dia promer mester haci peticion.
ABOGADONAN KIER MAS INVESTIGACION
Abogado mr. Lejuez di d M. a bisa Hues cu durante combersacion cu su cliente, a compronde cu d.M., despues di a check su documentonan a haya un map di anotacion cu ta importante pa e caso. Despues di a evalua e anotacionnan, e abogado ta haya cu mester haci mas investigacion. Ta anotacionnan cu d M. a haci na April 2018 ora el a papia cu e dama T., kende tabata sospechoso den un investigacion.
E abogado a pidi pa investiga si e cellular cu d M. tabatin, tabata confisca pasobra ta acusa d.M. di a malversa e cellular. E abogado a bisa Hues cu na November 2018, d M. a duna e cellular na comisario di Polis den presencia di un otro agente ora cu a dun’e prohibicion pa drenta oficina. E abogado a señala cu despues a haci investigacion riba e cellular cu autorizacion siendo cu promer no a duna autorizacion. Segun mr. Lejuez, tin dos Fiscal cu a bisa cu mester detene e dama T. pero ningun momento a duna orden di detencion. E kier claridad riba esaki pasobra su cliente ta wordo acusa di lo a haci palabranan cu e dama T.
Abogado mr. Illes a splica cu durante cu tabata studia e caso hunto cu su cliente D., a haya cu mester di mas investigacion. Papia di un dama T. cu lo a papia cun’e siendo cu e ta un sospechoso. Ta papia di un cellular cu lo a wordo malversa. E abogado kier mas investigacion.
Tanto mr. Lejuez como mr. Illes a pidi pa scucha como testigo diferente agente.
REACCION FISCAL
Fiscal a reacciona cu esaki ta contra e proceso normal di Corte. El a bisa Hues cu e ta haya straño cu abogadonan ta bin cu e peticionnan asina laat. Fiscal a bisa cu e por compronde cu abogado ta papia cu su cliente pero 5 luna pasa nan a haya esaki y cu e ta spera cu esaki a sosode tempran. Fiscal ta haya straño cu 9 dia promer cu e dia cu tabatin planea pa e caso, e abogadonan ta laga sa cu lo tin peticion y 1 dia promer cu e caso ta bin cu e peticionnan. Fiscal su promer reaccion ta cu Hues mester rechaza tur e peticionnan.
Fiscal a reacciona cu mester di autorizacion di Hues Comisario pa haci investigacion riba cellular. Tin hurisprudencia cu ta mustra den ki situacion mester pidi Hues Comisario autorizacion. Aki ta trata di combersacionnan entre d M. y e dama T. No tin aki situacion di bida priva di persona.
Pa loke ta e peticion pa scucha dos Fiscal, el a pidi Hues pa rechaza esaki pasobra no tin relevancia. Si a acaso Hues kier tog, nan lo por traha un procesverbaal.
Pa loke ta e buki di anotacion di d M., Fiscal ta haya relevante y lo mester traduci di Papiamento na Hulandes e partinan cu ta importante. El a mustra cu e buki di anotacion ta propiedad di Cuerpo di Polis pasobra d M. como agente di Recherche a haci anotacionnan na oficina. El a bisa cu d M. no tabatin autorizacion pa coy esaki ora el a bay bek oficina y cu esaki no ta legal.
Pa loke ta investigacion riba cellular, Fiscal no ta haya esaki relevante. El a bisa cu si Hues ta desea lo mester laga Landsrecherche investiga, ki tempo e cellular aki lo a wordo confisca y tabata den lachi di oficina di d M.
Fiscal a bisa cu e no tin nada contra pa scucha 4 di e 6 sospechoso.
Hues despues di a scucha Fiscal y e abogadonan a bisa cu lo bay studia e opinionnan y dialuna lo duna su decision.
