Derecho di privacidad ta keda respeta - ORANJESTAD (AAN): Diaranson den oranan di merdia, Hues di Corte den Promer Instancia a dicta sentencia den e caso sumario cu AVP a cuminsa contra Gobierno.
Manera DIARIO a publica, AVP a cuminsa e caso pasobra Minister Presidente y Conseho Electoral di Aruba a nenga di duna e lista di votadornan.
Minister Presidente y Conseho Electoral ta considera cu esaki ta un violacion di e privacidad di hende ya cu ta haya nombernan completo y adres. Di parti di AVP a mustra cu e asunto aki a wordu trata den Parlamento caminda a dicidi cu no ta haci cambio den e ley. AVP tambe a bisa cu nan no mester di adres. E meta di esaki ta pa AVP por controla e votadornan.
SENTENCIA
Hues den su sentencia ta ordena Gobierno pa awe 24 Juni 2021, no mas laat cu 12’or di merdia, AVP haya e registro di votadornan. E lista di votadornan ta limita den nomber y districto unda nan tin cu vota y no tin adres.
Hues a mustra cu mescos cu abogado mr. Sjiem Fat di AVP a mustra, articulo 10 lid 2 di e ley di votacion, e partido tin derecho di haya 2 copia di e registro di votacion.
Hues a bay hopi amplio riba e parti di privacidad di hende manera ta para den articulo 8 di EVRM. Hues ta mustra cu segun articulo 8 di EVRM lid 2, por hustifica un violacion riba e privacidad di hende ora cu esaki ta necesario den un comunidad democratico.
Hues ta haya cu mester por haci control legitimo manera esnan di Gobierno ta haci durante votacion pero tambe di banda di e partidonan politico cu ta participa den eleccion.
DECISION
Hues a dicidi cu Gobierno mester facilita copia di e registro dia 24 Juni 2021 mas tarda 12’or di merdia. E registro di votadornan ta contene solamente nomber di e votadornan y e districto unda nan tin cu vota.
