ORANJESTAD (AAN): E homber Venezolano R.G., kende riba 6 November 2020 a wordo tira door di Guarda Costa durante un persecusion riba laman,
a scucha Hues confirma e exigencia di Fiscal y a conden’e na 4 aña di prison. E ta wordo haya culpable di a bin Aruba den un boto cu no ta den condicion pa navega y riba e boto aki tabatin 10 ilegal y 287 kilo di marihuana.
CANTIDAD DI ILEGAL Y DROGA
Tratamento di e caso a tuma lugar luna pasa caminda Hues a mustra cu segun e relato di Guarda Costa, dia 6 November 2020, Guarda Costa a intercepta un boto sospechoso. A duna señal pa para pero no para. E momento ey miembro di Guarda Costa a cuminsa tira riba e boto riba cual tabatin un cantidad di hende. A herida R.G. na pia y e momento ey tambe nan a mira hende ta tira cos den laman. A resulta cu tabatin 10 hende abordo. A usa e cacho anti droga y e cacho a reacciona na e parti patras di boto. Su siguiente dia Guarda Costa a bay investiga riba laman riba e ruta di persecusion y vecindario. A bin haya 11 jerry can cu tabata yena cu droga. A confisca 287 kilo di marihuana. Ta sospecha cu e droga ta procedente di e boto cu nan a tira riba dje pa el a para.
EXIGENCIA DI FISCAL
Fiscal ta haya legalmente proba cu R.G. a trafica droga y un cantidad di hende ilegal. Fiscal a bisa cu aunke R.G. ta para riba cu e no ta capitan di e boto, tin diferente persona cu a declara cu ta R.G. tabata e capitan di e boto. Ora Guarda Costa a intercepta e boto, a mira hende ta tira cosnan den laman. En total 287 kilo di marihuana a keda confisca. Na opinion di Fiscal, ta R.G. a duna orden pa tira e jerry can’s den laman. El a mustra cu R.G. a trafica hendenan ilegal riba un boto cu no ta cumpli cu exigencianan di navegacion. No tin salba bida, no tin luz, no tin GPS riba e boto. Fiscal a bisa cu traficacion di ilegal ta mina e maneho di Gobierno. El a remarca cu apenas R.G. a sali liber di KIA pa algo similar e ta bolbe cay pa trece ilegal y droga. Fiscal a exigi 4 aña di prison.
SENTENCIA
Hues ta haya legalmente proba cu riba 6 November 2020, R.G. a importa marihuana y trece un cantidad di ilegal den un boto. Pa cu e castigo, Hues a bisa cu e ta tene cuenta cu ta 287 kilo di marihuana a confisca y cu e boto no ta den condicion pa trece cantidad di hende. Tambe Hues a mustra cu no ta promer biaha cu R.G. ta haci esaki. Hues a confirma e exigencia di Fiscal y a condena R.G. na 4 aña di prison, kitando e tempo cu e ta sera den KIA.
