Hues a sentencia e grupo
ORANJESTAD (AAN) – Diabierna mainta via video conference, Hues di Corte di Husticia, a dicta sentencia den e caso penal contra e grupo di homber: J.G., C.B., O.T., B.F.
Door cu e acusado J.G. tin problema cu e otronan, mester a separa nan. Por a nota cu Hues a bay di acuerdo cu algun di e exigencia di castigo di Fiscal pero pa e cabezante C.B. a reduci esaki di 6 pa 5 aña do prison y cu cierto cosnan confisca por wordu duna bek.
CANTIDAD DI DROGA HAYA
Tratamento di e caso aki a tuma lugar algun siman pasa caminda Hues a mustra cu dia 28 October 2020 Polis a haya autorizacion di Fiscal y Hues Comisario pa haci investigacion na e cas di C.B. caminda a haci observacionnan. Nan a bay vigila y a detene varios persona cu a cumpra. Nan a bay na e cas y detene e dama A.v.d.P. pafor mientras cu C.B. a core bay pero despues a keda deteni. A haci investigacion den e cas y a haya diferente droga, atributonan di droga, placa. Den bahul di un auto a haya saco cu placa, 599 gram marihuana, 106 gram di cocaina, 620 dollar y mas cu 10 mil florin. Den dos meya a haya dos revolver. Un di nan tabatin 5 bala aden. A confisca un motocicleta, un balansa, den un tas den bahul di e auto, a haya un buki cu cantidad di nomber di hendenan. A ripara cu tabatin administracion ki tipo di droga tabata worde bende. Tin di e nombernan den e buki cu ta conoci pa Polis como hendenan meti den droga. Den un tas bao di dak, a haya 36,6 gram di marihuana, 91 pilder XTC, 84 gram di cocaina, 6 gram di heroina. Den e cas a haya 98 pilder di XTC, 106,3 gram di cocaina, 193 gram di hash. E hash a resulta canabisoil. Hues a splica cu tin un decreto ministerial cu hende por tin un cierto cantidad di canabisoil. Polis tambe a haya mas di 700 cabez di mata di marihuana. Den un otro tas a haya 1096,9 gram di cocaina.
EXIGENCIA DI FISCAL
Fiscal a exigi 6 aña di prison pa C.B. Pa loke ta B.F., Fiscal a exigi 18 luna di prison.
Pa loke ta O.T., Fiscal a exigi 18 luna di prison di cual 9 luna ta condicional y 2 aña di prueba.
Pa loke ta J.M.G., Fiscal a bisa cu e ta tene cuenta cu J.M.G. ta un residivista. El a exigi 18 luna di prison y impone e castigo condicional cu tabata pendiente.
Fiscal tambe a exigi pa confisca tur loke a keda confisca especialmente na cas di C.B.
SENTENCIA
Ayera mainta Hues a bisa cu mescos cu Fiscal, e ta haya legalmente proba cu C.B., durante 2 aña tabata bende cocaina. Tambe a keda legalmente proba, posecion di 2 arma di candela y un di nan tabata carga cu bala. Hues a bisa cu e no ta haya legalmente proba cu CB tabatin heroina den su poder. Hues a mustra cu Polis no a manda e test di e heroina cu nan a tuma laboratorio.
Pa loke ta J.G., Hues ta haya legalmente proba cu durante 1 aña, J.G. tabata bende y entrega droga.
Pa loke ta O.T., Hues ta haya legalmente proba cu hunto cu 1 otro, durante 8 luna a entrega droga. Tambe cu O.T. a viola ley di toque de queda.
Pa loke ta B.F., Hues ta haya legalmente proba, cu durante 2 luna, B.F. a bende cocaina y duna marihuana. Ademas dia 4 December 2020, durante investigacion na su cas, Polis a haya cocaina y marihuana.
DROGA Y ARMA TA PROBLEMA
Hues a bisa cu pa cu e castigo, e ta tene cuenta cu castigo cu Hof ta duna. Hues a bisa cu benta di droga ta trece tristeza y problema den comunidad. Arma ta trece tristeza y problema den comunidad. Aruba no kier esakinan. El a bisa cu e ta tene cuenta cu J.G. den pasado a comete un delito similar. B.F. tambe den pasado, a wordo condena caba pa droga.
CASTIGO
Hues a condena C.B. na 5 aña di prison, kitando e tempo cu e ta sera den KIA. J.G., a wordo condena na 18 luna di prison di cual 6 luna ta condicional cu un tempo di prueba di 2 aña y bou guia di Reclasering. O.T. a wordo condena na 18 luna di prison di cual 9 luna ta condicional cu un tempo di prueba di 2 aña y bou guia di Reclasering. Hues a condena B.F. na 10 luna di prison.
Pa loke ta C.B., Hues a bisa cu e auto lo keda confisca, pasobra eyden a haya cantidad di droga, placa y armanan di candela. Hues a sigui bisa cu e brommer lo wordo debolbe y tambe 1700 florin. Tur e otro cosnan y e cantidad di placa lo keda confisca.
