Nan a haci asalto brutal riba un homber di 83 aña y tira un Venezolano cu nan kier a “hit”
ORANJESTAD (AAN): Siman pasa, for di mainta te den oranan di atardi, den un sala di Corte di Husticia a trata e caso penal contra 4 Arubiano, kendenan ta worde sospecha di casonan serio. Parce cu tabatin menaza entre e sospechosonan N.P., D.R., H.H. y D.B. y por a mira presencia di varios miembro di CEA y hasta Polis.
ACUSACIONNAN: Fiscal a bisa cu e acusacionnan contra D.B., N.P. y H.H. ta:
Ria 15 Augustus 2020 den oranan di marduga nan a haci un asalto brutal riba un homber P. di 83 aña den su cas. Nan a dal P. cu un bara di hero riba cabez y mientras cu P. tabata benta abao ta sanger, nan a bay coba den e cas y bay cu placa, prenda, televisor. Despues nan a hiba e homber den su camber y mare na man y pia y despues bay.
Dia 4 September 2020, nan a purba mata un homber Venezolano C. Nan a tira C. tres tiro biaha den lomba cu e intension di horta placa y droga di dje.
Fiscal tambe ta acusa N.P., cu riba 28 Augustus 2020, a haci ladronicia na un cas na Esso Heights, mientras e famia tabata drumi den e cas. Tambe cu entre October y November 2019, N.P. tabatin un brommer horta.
Fiscal a acusa H.H. tambe cu entre October y December 2019, tabatin un brommer horta.
Fiscal a acusa D.R. di a cumpra un television y un iPhone horta.
ASALTO CAS: Hues a mustra cu e homber P. (83) haci denuncia na Polis.
El a bisa cu mas o menos 2.30 di marduga, el a bula spierta di soño door di sonido na porta di camber. Ora P. a habri e porta, el a mira 3 homber para. Un di nan a dal’e hopi duro cu algo na su cabez. El a cay abao y tabata sangra hopi na su cabez. Despues a resulta cu un di e asaltantenan a dal’e cu bara di hero. Mientras cu P. ta benta abao riba suela, e tabata scucha e trio tabata busca cosnan den cas y nan tabata papia Papiamento cu otro. Despues nan bolbe y hib’e den camber y mara su mannan y pianan cu su mesun dashi y bay lag’e asina.
Despues di basta rato, cu un cap grandi na cabez sangrando, P. a logra los y el a yama Polis. El a worde hiba hospital, caminda dokter a constata cu P. a sufri un cap grandi cu mester a worde cosi. E yiu homber di P. a presenta den Corte pa haci demanda di daño. Hues a puntr’e con a sigui cu su tata. El a bisa Hues cu su tata a keda cu spanto y no kier biba mas den e cas. E tata actualmente ta bibando cerca e yiu.
TIRA HOMBER TRES BIAHA: Hues a mustra cu dia 4 September 2020, D.B., N.P., H.H. a tira riba e homber C.
Hues a puntra D.B. si ta berdad y D.B. a bisa cu tur cos el a bisa Polis. D.B. na Polis a declara cu hunto cu N.P. a bay Village y topa cu D.R. Ta D.R. a bin cu e idea pa haci ganga riba e homber Venezolano C. cu ta bende droga. D.R. tabatin su number, N.P. a yam’e pa haci un deal pa cumpra droga. E plan tabata pa “hit” C. y bay cu su placa y droga. Nan bay na e lugar unda C. tabata warda nan. N.P. subi den auto dilanti hunto cu C. y saca arma pone na cabez di C. D.B. a subi patras den e auto. N.P. a tuma stuur y D.B. patras.
E Venezolano C. mester a bay sinta patras mientras cu N.P. a pasa D.B. e arma. E intension tabata pa bay cas di e Venezolano C. pa coy droga y placa. Na caminda pa bay e cas di C., nan a pasa busca H.H. Ora nan a yega na e cas, nan a mira hopi hende y a dicidi di bay otro caminda. Segun N.P. den Corte, el a hala D.B. su atencion pa stop di menciona su nomber y D.B. a bis’e pa no worry pasobra e ta tira C. mata. Ora cu H.H. tabata sinta dilanti, na dado momento C. a bira hopi nervioso y a para e auto pa asina H.H. tambe bay sinta patras. E momento ey nan tabata den vecindario di Palo Marga.
Ora cu H.H. a habri e porta, C. a sali core bay. D.B. a los un tiro y C. a cay. El a lanta y sigui core y D.B. a los dos tiro mas cu a herida D.B. den lomba. Na hospital mester a opera C. pa saca dos di e balanan. Un di e balanan a keda pega den su weso di lomba y ta teme pa saca esaki pasobra e ora ey C. por keda handicapped.
CELLULAR DEN KIA: D.R. ta desmenti cu el a duna number di cellular di e Venezolano y di a bin cu e plan pa “hit” e Venezolano C. El a bisa Hues cu e no ta papia cu D.B.
Hues a mustra cu anterior a pospone e caso pasobra na KIA a haya cellular caminda D.R. tabata papia cu D.B. D.R. a bisa D.B. cu N.P. ta spanta y cu el a bisa N.P. pa laga D.R. afor. El a bisa Hues cu e no tabata sa cu H.H. no ta envolvi y a bisa pa laga H.H. afor tambe. El a admiti di a cumpra un television horta pero no tin nada di haci cu caso di asalto y tampoco e hit riba e Venezolano C. Hues a bisa D.R. cu e no tin nada di haci cu e asalto. E ta worde sospecha di a duna e number y a bin cu e plan pa hit e Venezolano C. Tambe cu e tabatin un television y un I Phone horta.
E victima di ladronicia S. na e cas na Esso Heights a demanda mas o menos 5 mil Florin. Yiu di e homber P.(83) a demanda mas di 10 mil Florin y inmaterial 39 mil Florin. El a bisa cu nan por a mata su tata.
EXIGENCIA DI FISCAL: Fiscal a cuestiona e forma con D.B. a dal P. (83) cu e bara di hero.
Fiscal ta haya cu ta un milager cu P. a keda bibo. Den Corte Hues a mustra e sospechosonan e potret di e cap grandi na cabez di P. Fiscal a sigui bisa cu e Venezolano C. a worde secuestra y ta un milager cu e no a muri. Un bala ta den un weso lomba y ta un riesgo pa saca esey pasobra e lo por keda handicapped.
Fiscal ta haya D.B., N.P. y H.H. complice di intento di mata. D.B. lo a bisa N.P. cu lo bay mata C. y a bisa pa bay den vecindario Palo Marga. Fiscal a mustra cu tres siman promer 15 Augustus 2020, e mesun trio aki, D.B., N.P. y H.H. a haci e asalto brutal riba e homber P.(83) na su cas. Despues di a tira C. den lomba ora el a huy, H.H. a sende e auto di C. na candela banda di santana Zeewijk.
Fiscal ta haya D.R. culpable di a cumpra un television horta for di N.P. Tambe e ta haya cu D.R. ta complicidad di e asalto door di duna informacion pero no tabata activo.
CASTIGO: Pa cu e castigo, Fiscal a bisa cu e ta tene cuenta cu D.B., N.P. y H.H. tin carchi di castigo.
El a mustra cu den apenas 3 siman nan a haci asalto, intento di mata y sende auto na candela. Na 2020 nan a sali for di KIA. Fiscal a exigi pa D.B. 15 aña di prison, N.P. 13 aña di prison, H.H. 12 aña di prison y D.R. 4 aña di prison. Despues di a scucha e defensa di abogadonan, Hues a bisa cu e ta bay studia e caso y dentro di algun siman lo por spera sentencia.
