ORANJESTAD (AAN): E homber Colombiano J.Q (43) recien a presenta dilanti Hues den Corte di Husticia pa e caso penal cu Ministerio Publico a cuminsa contra dje.
Fiscal ta hay’e culpabel di posesion di un revolver cu bala y a exigi 21 luna di prison. Hues a haya J.Q. culpabel y a conden’e na 18 luna di prison.
E acusacion cu Fiscal a presenta den Corte contra J.Q. ta cu riba 26 Februari 2023, e tabatin un arma di candela, revolver Caliber 38. Tambe e ta wordo acusa cu entre 7 October 2022 y 26 Februari 2023, e tabata den posesion di arma y balanan.
POSESION DI ARMA
Segun J.Q. e no tabatin arma. El a bisa cu el a core pa Polis, pasobra e tabata burachi y 9 aña ilegal na Aruba. El a bisa cu for di 2013 te cu awor e ta ilegal. E tin famia aki y pesey el a core bay. El a bisa cu e no ta meti den e cosnan di arma di candela.
Hues a bisa cu J.Q. a duna declaracion na Polis caminda el a mustra Polis un permiso falso. Hues a bisa cu J.Q. a bisa cu un tire di patras di e auto lo a rementa. Esey ta loke Polis lo a scucha y kere cu ta un arma a los un tiro. Segun J.Q. e no a declara esey. El a bisa cu el a core pa Polis y a para na Madiki. Polis a bisa cu a sigui tras di J.Q. pasobra a scucha un sonido manera un tiro y mira J.Q. core bay duro den Kerkstraat. A surgi un persecucion y na altura di un cas na Madiki, a mira J.Q. tira algo afor di auto. E patruya a pidi otro patruya pa bay check banda di e cas. A bin haya un revolver benta ariba un tereno bashi.
J.Q. ta para riba cu nunca e tabatin arma. Hues a mustra cu Polis a haya den J.Q. su cellular potret di un revolver cu ta parce hopi riba e arma cu a haya benta riba e tereno. Segun J.Q. e potret ta manda via whatsapp for di Colombia. J.Q. a bisa Hues, ta parce e arma ta un cos y cu e ta un arma ta henter un otro cos.
FISCAL
Fiscal a bisa cu J.Q. ta bisa cu nunca e tabatin arma di candela. Pero e agentenan di Polis cu a sigui su tras a scucha un arma tira y a mira J.Q. core bay. Durante e persecusion, e agentenan a mira J.Q. tira algo afor ariba un tereno banda di un cas. A resulta cu esey tabata un revolver cu balanan Caliber 38. Tabatin un huls cu a haya, cu ta indica cu a los un tiro cu e arma aki. Na opinion di Fiscal, si sigui e descripcion di e raport di Polis, esey ta e arma cu J.Q. tabatin riba 26 Februari 2023. For di potret cu a haya den J.Q. su cellular, por conclui cu for di 7 October 2022 e tabatin e arma. Segun Fiscal, por mira potret di un man cu ta tene e revolver y balanan cu ta cuadra cu loke a haya riba e tereno benta. E man ta mustra cu ta man di J.Q. Na opinion di Fiscal, esey ta haci cu J.Q. ta culpable di posesion di arma y balanan.
Pa cu e castigo, Fiscal a bisa cu tin un problema grandi na Aruba cu arma di candela. Aki tin indicacion cu J.Q. a usa e arma. Fiscal a expresa cu Ministerio Publico no kier pa tin arma di candela den comunidad di Aruba. Hende inocente por perde nan bida. Fiscal a exigi 21 luna di prison di cual 6 luna ta condicional cu 3 aña di prueba. E cellular confisca lo wordo debolbe y e arma mester wordo saca for di circulacion.
ABOGADO
Mr. Kuster a bisa Hues pa tene cuenta cu J.Q. a core bay pasobra e tabata ilegal. E tiro cu Polis a scucha no por relaciona esaki cu comportacion di J.Q. E abogado a bisa cu J.Q. ta manteniendo su famia na Colombia y ta promer biaha cu e ta cay sera. E abogado ta haya e castigo exigi pa Fiscal un poco halto y ta laga na Hues pa dicidi.
SENTENCIA
Hues a sera tratamento di e caso y a dicta sentencia di biaha. Hues a bisa cu e ta haya legalmente proba cu J.Q. tabatin un arma di candela. El a bisa cu dos agente di Polis a scucha un tiro y a mira hendenan a core. A mira J.Q. core bay cu velocidad. Durante persecusion di J.Q. a mira J.Q. ta tira algo afor. A resulta cu esey ta un revolver. Den su cellular a haya potret di un revolver cu ta parce esun cu a benta afor.
Hues ta haya J.Q. culpabel di posesion di arma den auto. El a tene cuenta cu ta promer biaha cu J.Q. ta cay den man di husticia y a conden’e na 18 luna di prison di cual 6 luna ta condicional cu 3 aña di prueba. Hues a ordena pa destrui e arma di candela.
