Victima Sayuri lo no worde lubida...
ORANJESTAD (AAN): Manera ta conoci, e agresor hoben I.M. Principaal, kende ta parce di ta esun cu a tira mata e hoben Sayuri Petronia di 19 aña dia 4 di Juni 2021 a apela su sentencia di 9 aña di prison. Corte Superior (Hof) a djis duna Principaal un detencion hubenil di 4 aña, y un medida di 2 aña den un Institucion pa Hobennan (P.I.J.).
Diaranson atardi, a haya informacion oficial di Ministerio Publico, cu nan no ta di acuerdo cu e decision di Hof, y pesey nan ta escala e caso y mande awor pa casacion. Tur esaki contra sentencia di Hof duna den asesinato di Sayuri.
Ministerio Publico a bay den casacion contra sentencia di Corte Superior di 10 di juli ultimo. Corte Superior a condena e sospechoso I.M.P. (kende esten tabatin 17 aña bieu) entre otro, pa tira e mucha muher Sayuri Petronia di 19 aña mata pa un castigo di 4 aña di detencion di hobennan y imposicion di e medida P.I.J.
Ministerio Publico a pone tata di e victima mortal awe na haltura di e decision aki.
