Ministerio Publico a emiti resultado di e investigacion:
ORANJESTAD (AAN): Diabierna atardi, Ministerio Publico a emiti algun detaye cortico relaciona cu e caso di siman pasa caminda dos persona a aparece riba 19 di juli ultimo comunidad di Aruba wordo sacudi pa morto violento di un muher di 49 aña y un homber di 35 aña.
Bao guia di Ministerio Publico, polis a investiga morto di e dos personanan aki. Den cuadro di esey a haci tambe investigacion tecnico forensico amplio pa haya sa kico exactamente a sucede e dia ey.
Investigacion a mustra cu e homber J.M.G.M. a mata e muher L.G.C.R. den su cas na Washington y cu despues el a comete suicidio na costa di Bushiribana.
No tin ningun indicacion di envolvimento di un tercer parti den asesinato di señora C.R.
Ministerio publico a pone famia di señora na haltura di e conclusionnan di e investigacion.
NOTA DI REDACCION:
Na otro banda, mester agrega cu mientras cu ya caba e victima, L.G.C.R, su cremacion a tuma lugar, pa loke ta J.M.G.M., su curpa a wordo hiba funeraria siman pasa despues di a realisa su autopsia. Contrario na loke algun medio a vocifera, si tin amigonan na Aruba y famia na Venezuela cu ta atendiendo cu ne. Tin amigonan cercano cu a responsabilisa pa ricibi na funeraria e restonan mortal, cu a wordo entrega riba diabierna siman pasa.
A informa DIARIO cu te cu diahuebs, e siman aki, nan a haya e 'overlijdens akte' y pa e motibo ey no por a bay over na su cremacion, pero awor ta pendiente di e proceso pa e cremacion por tuma lugar den e proximo dianan.
Famia na Venezuela y amigonan tambe ta sufriendo pa e perdida di nan ser keri y ta lamenta masha hopi mes locual a sosode.
