Fiscal a baha cu tur peso di ley --- ORANJESTAD (AAN) – Corte di Husticia a trata diabierna e caso di asesinato cruel contra Wuill Vrolijk (21), Joshua Wouters (25), Yael Frans (30) y Brandon Wouters (22).
Tur ta wordo haya culpable di complice di asesinato cruel di Lisander Leonardo Ignacio (Sami)(21) riba 15 Januari 2021.
Ta asina cu Brandon a presenta den rolstoel. Esaki ta debi cu na Juni 2019 el a wordo tira door di un miembro di e gang di Pos Chiquito. E bala a perfora un pulmon y a afecta su weso di lomba.
Tratamento a dura practicamente henter dia caminda Fiscal a baha cu tur peso di ley riba e grupo aki. Especialmente e rumannan Joshua y Brandon, pa kendenan Fiscal a exigi 22 aña di prison. Pa Vrolijk y Frans, Fiscal a exigi 16 aña di prison.
SEGURIDAD PISA DEN SALA DI CORTE
Pa basta tempo no sa mira seguridad pisa den sala di Corte. Ayera esey tabata e caso. E cuater sospechosonan a wordo treci Corte bou escolta pisa mientras cu den sala di Corte tabatin un batayon di tanto miembronan di CEA como e unidad special di KIA y Polis. Por a mira un cantidad di esnan di KIA cu jacket contra bala y arma. E agentenan di Polis tambe tabatin jacket contra bala y arma. Algun di esnan di CEA tabata arma. Den sala tabata presente e mama di Sami y e dama cu kende Sami tin un yiu. Tambe tabata presente un familiar mientras cu den tribuna ariba tabatin miembronan di Recherche cu a bin scucha e caso y otro personanan.
TACTICA SPECIAL DI HUES
Ayera por a nota cu e Hues cu a atende e caso a usa un tactica special. Promer el a trata e caso di e dos rumannan Joshua y Brandon Wouters y despues a trata Yael Frans hunto cu Wuill Vrolijk. Durante tratamento di e caso por a compronde e motibo di e tactica aki. Di e forma aki Hues a saca mas probecho di haya declaracion di Frans y Vrolijk pa nan no declara dilanti e dos rumannan. Normal durante tratamento di casonan penal, hopi biaha sa presenta e situacion caminda un sospechoso tin miedo di declara contra un otro. Ayera por a ripara cu tanto Frans como Vrolijk a declara cu nan no tabata sa cu ta venganza e rumannan a bay tuma riba Sami.
E rumannan Yoshua y Brandon a para riba cu nan no tin nada di haci den e asesinato aki. Yoshua a bisa cu e tabata na cas ta hunga riba play station. Brandon a nenga retundamente cu e asesinato aki tin di haci cu na 2019 el a wordo tira y cu e culpable Calvin Kelkboom ta sintando castigo den KIA.
DEMANDA DAÑO
Mama di Sami y e mama di e yiu di Sami, A.L., a haci demanda di daño. E mama di Sami a bisa cu e no a spera cu e muchanan ta bay haci algo asina cu su yiu. El a demanda 5 mil florin pa daño haci na su auto y 8640 florin pa gasto di entiero. El a exigi daño inmaterial di 6 mil florin pa e dolor cu el a sinti di a perde su yiu y ta hayando tratamento di psycologo. El a bisa cu despues di e asesinato el a keda 3 siman na cas sin por a haci nada. Rumannan a bay yud’e. E mama di e yiu di Sami, A.L. a exigi ayudo pa cria e yiu. El a bisa Hues cu e mucha cada vez ta puntra pa su tata y ta yora. El a bisa cu e mes tin cu bay psycologo. E tabata haya 500 florin of mas for di e difunto pa mantene e mucha (5). El a bisa cu e ta traha pero no ta suficiente.
VIDEONAN DI SEGURIDAD A YUDA
Fiscal a bisa cu ta un caso hopi tristo. Un hoben (21) a wordo mata 15 Januari 2021 na forma cruel. E caso aki a conmove henter comunidad. Sami tabata sinta den su auto dilanti cas y a wordo tira den cabez y a fayece. Patologo a constata 2 tiro den cabez y e tironan a wordo haci hopi cerca di e cabez. El a constata cu Sami a muri e mesun momento. Tin testigonan a scucha 3 tiro duro. Polis a haya 3 huls na banda di auto. Ta un pistool 9 mm Winchester. Investigacion a mustra cu esun cu a tira tabata para na e porta di chofer. Un di e balanan a pasa door di e porta y a bay para den cura di bisiña. Den parti paden di e auto a haya e otro 2 balanan cu lo ta esnan cu a herida Sami den cabez.
Tin hendenan a mira tres of dos hende core bisti full na preto. Tin hende ta bisa cu a mira 3 hende cu cara tapa. Fiscal a bisa cu for di compilacion di imagennan di video di seguridad di casnan den vecindario, a bin haya un bista kendenan tabata envolvi. Promer a reconoce Vrolijk como esun mas largo. Tambe a mira e auto y despues di investigacion a bin haya sa cu e auto ta di Vrolijk. E tabata e promer sospechoso cu a wordo deteni. A base di declaracion di Vrolijk a bay over na detene Frans. Vrolijk a bisa cu el a bay hiba Yoshua Wouters Pos Chiquito pa e wak su chick y Brandon Wouters tambe tabata den auto.
PROBLEMA DI GANG
Fiscal ta haya legalmente proba complice di asesinato pa tur cuater sospechoso. Fiscal a bisa cu e problema di gang ta un asunto serio na Aruba.
CASTIGO PISA
Pa cu e castigo, Fiscal a bisa cu e ta tene cuenta cu ni cuanto castigo exigi, no ta trece Sami bek y no lo kita e sufrimento cu e mama y famia ta pasando.
Fiscal ta haya tur culpable di asesinato sanger friu. El a bisa cu apesar cu nan ta complice lo tin diferencia den castigo pasobra e ta haya cu tin diferencia den funcion.
Na opinion di Fiscal, si Brandon no a insisti, e asesinato cruel aki no a tuma lugar.
El a exigi pa Brandon y Yoshua, 22 aña di prison. Pa Frans y Vrolijk el a exigi 16 aña di prison.
