Ministerio Publico a apela sentencia di Hof --ORANJESTAD (AAN): Recien DIARIO a publica cu ainda Paul Croes no a dicidi si e ta bay apela e sentencia di Hof di Corte Superior y bay casacion di Corte Supremo.
Den combersacion cu e abogado mr. Illes, el a duna di conoce cu e lo bay reunion cu tanto Paul Croes como Melony Croes Paesch pa mira kico lo ta bay haci.
MINISTERIO PUBLICO A APELA SENTENCIA:
Ta asina cu Hof di Corte Superior despues di a lesa e sentencianan a bisa cu cada un tin 14 dia pa apela y bay casacion Corte Supremo. Esey ta conta tambe pa Ministerio Publico.
Apenas dos dia despues di e sentencia di Hof di Corte Superior, Ministerio Publico a apela e sentencia di Hof contra Melony Croes Paesch. Den combersacion cu mr. Illes, el a bisa cu ainda no tin decision pero cu PG a notifica cu a apela e sentencia contra Melony Croes Paesch. E abogado a duna di conoce cu el a keda asombra cu esaki.
A SEÑALA FAYO DEN INVESTIGACION:
Ta asina cu durante tratamento di e caso den Corte Superior luna pasa, mr. Illes a presenta cu algun experto financiero, kendenan a bati riba dede di Ministerio Publico mustrando cu e calculacion cu nan a haci pa acusa Melony Croes Paesch di a laba mas o menos 209 mil Florin, no ta corecto.
Den Corte e expertonan a splica Hof cu e expertonan di Hulanda cu Ministerio Publico a usa, no conoce e codigonan bancario di Aruba y door di esey nan a interpreta cosnan robez.
MELONY DECLARA LIBER:
Esey a causa tambe cu Hof no ta haya legalmente proba cu por papia di labamento di placa na e negoshi di Melony Croes Paesch y a declara Melony Croes Paesch liber pa e acusacion di labamento di placa.
E decision aki, Procurador General di Ministerio Publico no ta di acuerdo cun’e y a apela. Falta mas cu 1 siman ainda pa apelacion contra sentencia di Corte Superior por tuma lugar. Tempo lo mester si Paul Croes ta apela of no.
