ORANJESTAD (AAN): Hof di Corte Superior a baha e castigo di e homber T. y e muher V., kendenan a worde condena pa a abusa di 3 mucha menor di edad.
Ta asina cu T. y V. a apela nan sentencia di Februari 2021, caminda Hues a haya nan culpable di a abusa di muchanan menor cu 16 aña. Hues a condena T. na 7 aña di prison y V. na 4 aña di prison.
Despues di tratamento di e apelacion e luna aki, recien Hof a dicta sentencia caminda Hof a baha e castigonan cu 1 aña.
ACUSACION:
Procurador General (PG) a acusa T. di a abusa di tres mucha y cu V. a yuda cu un mucha so. E abusonan a sosode diferente biaha entre April 2019, Juni 2020 y October 2020. E muher V. a forza tene pia di su yiu muher habri, mientras cu T. a tene relacion sexual cun’e.
SET-UP PA KITA YIU:
Hof a puntra pakico V. a apela. Segun V. tin hopi cos cu no ta cuadra y e no ta compronde pakico nan no a papia cu su yiu homber cu tabata presente. El a remarca cu si tabata abusa di e muchanan, pakico nan tabata yama pa ta cerca nan weekend.
- a bisa cu el a apela pasobra e ta inocente. E ta haya cu ta un set-up di e mama di V. y e mama di e otro dos muchanan. Segun V., su mama tabata kier pa su dos yiunan worde kita for di dje.
EXIGENCIA DI PG:
PG a mustra cu si mira con a forza e mucha pa tene relacion sexual, mester papia di violacion di mucha y cu V. ta complice. E ta haya cu e tres muchanan ta victima di abuso sexual.
PG ta haya cu aki ta trata di un caso hopi serio caminda T. a worde condena na 7 aña y V. na 4 aña di prison. PG ta haya cu tanto T. como V. no ta reconoce nan culpa. E ta haya cu mester aumenta castigo pa T. di 7 pa 8 aña di prison y pa mantene castigo di 4 aña di prison pa V.
SENTENCIA:
Hof ta haya T. culpable cu durante un periodo largo y diferente biaha a viola e yiu muher di su partner V. y a tene relacion sexual cu muchanan bao di 12 aña.
Hof ta mustra cu PG a exigi pa subi e castigo di 7 pa 8 aña di prison. Pa cu e castigo, Hof a bisa cu e ta tene cuenta cu e raport di psycologo cu ta mustra cu T. ta menos responsabel pa su actonan. Hof a condena T. na 6 aña di prison.
Pa loke ta e muher V., Hof ta mustra cu V. tabata duna e muchanan bebe biña y T. tabata blaas huma di marihuana den nan cara.
Ademas V. tabata forza habri pia di su mesun yiu muher pa T. tene relacion sexual cun’e.
Hof ta haya cu V. ta complice di violacion di su yiu muher.
Hof ta mustra cu e lamentable incidentenan aki tabata sosode na cas, caminda e muchanan mester sinta nan mes sigur. Hof ta mustra cu V. a lanta su yiu for di soño, dun’e biña pa bebe, blaas huma di marihuana den su cara y forza habri pianan di su yiu pa su partner T. por abusa di dje.
Hof ta haya cu door di a actua asina, V. a tacha severamente e integridad di su yiu muher. Hof ta haya cu V. a abusa di e confianza cu su yiu mester tin den dje. Teniendo tur cos na cuenta, Hof a condena V. na 3 aña di prison.
E decision di Hof ta mustra, cu e castigo duna pa Corte den Promer Instancia esta 7 y 4 aña di prison, a worde baha pa 6 y 3 aña di prison.
