ORANJESTAD (AAN): Abogado mr. Arendsz Marchena di Jason Margarita, a reacciona riba e exigencia di Fiscal di 42 luna di prison, di cual 6 luna ta condicional cu un tempo di prueba di 2 aña.
E abogado ta haya cu tabatin un set-up di parti di e mama y ruman muher di e mucha A. contra Jason.
Ya caba den edicion di Diasabra, DIARIO a publica tratamento di e caso caminda Jason a bisa Hues cu el a enamora di e mucha pero no tabatin relacion sexual cun’e. Den e articulo aki, DIARIO ta publica e defensa cu mr. Arendsz Marchena a hiba.
- Arendsz Marchena a mustra Hues cu e mucha A. tabata bay den e gym di Jason, y Jason a percura pa A. bira un fitness instructor pa promove e gym.
MAMA A MENAZA DI LO KIBRA JASON: E abogado a bisa Hues cu na dado momento a surgi problema. E mama a drenta gym y grita A. pasobra A. tabata 5 minuut laat. Esaki a afecta e mucha A. E mama a menaza Jason di lo kibr’e.
- Arendsz Marchena a bisa Hues cu e ta haya cu tin duda den declaracion di e menor di edad. El a mustra cu Jason a bisa cu e tabatin un relacion amoroso pero door di presion di e mama y ruman muher grandi, A. a bay duna declaracion cu nan tabatin relacion sexual.
Na opinion di e abogado, nan a gaña cu A. y Jason lo tabatin relacion sexual den e auto di Jason y den camber di masashi den e gym. E abogado a remarca cu si mira e curpa grandi di Jason, ta imposibel cu e lo tabatin relacion den auto y den e camber di masashi.
E abogado a sigui bisa cu e mucha ta bisa cu no a usa condom. Pero den e auto di Jason y tampoco den e camber di masashi, no a haya ningun liquido cu ta mustra cu lo por tabatin relacion sexual. Esnan cu a bisa cu constant Jason tabata bay den e camber di masashi ora cu e mucha A. ta eynan, na opinion di abogado, esey ta pasobra den e camber di masashi tabatin e water cooler y machine di coffee.
MUCHA A GAÑA RIBA JASON: Na opinion di mr. Arendsz-Marchena, tin indicacionnan cu A. a bisa cu el a gaña riba Jason.
E abogado a bisa Hues cu tin testigo cu a bisa cu a scucha A. bisa cu el a gaña pasobra e tabatin miedo di su mama y ruman muher kendenan tabata maltrat’e. E mucha a bisa cu ta su abuelo y omo a abusa di dje.
SET-UP CONTRA JASON: E abogado a bisa Hues cu enberdad tabatin hopi combersacion riba Whatsapp entre Jason y A. Esaki ta algo cu Jason a admiti esaki y a splica cu e combersacionnan tabata relaciona cu cosnan cu mester pone riba Instagram y Facebook pa promociona e gym.
E abogado a bisa Hues cu facilmente ta cambia combersacionnan y manipula esaki. E ta referi aki cu ta e ruman muher di A. tabata manipula potretnan y combersacionnan y manda esakinan pa KZP. E potretnan y combersacionnan no ta procedente di e smartphone di A. y tampoco Jason. Na opinion di mr. Arendsz Marchena, tin indicacion cu tabatin palabracion entre personanan pa duna declaracion contra Jason.
El a menciona 3 testigo kendenan a declara exactamente mesun cos. Tin testigo a mustra cu e ruman muher di A. tabata cana den gym acerca personanan pa declara contra Jason. Pesey e abogado ta haya e declaracionnan aki no confiable. E ta haya cu mester declara Jason liber.
E abogado a bisa Hues cu e ta haya cu no tin suficiente prueba di sosten. Tur cos ta bin for di un fuente cu ta e mucha A. cu a conta na otro. E mucha mes a bisa cu el a bay acerca Jason y cu nan tabatin un plan pa ora e tin 18 aña lo bay dicidi kico lo bay pasa.
E abogado a bisa Hues cu ainda A. ta busca contacto cu Jason. E abogado a bisa Hues cu e ta haya cu Jason a worde castiga door di media door di persecusion politico. Awor e señora di Jason ta trahando apesar cu el a caba di opera wowo y mester sosega. E señora ta haciendo esaki pa mantene famia. Nan ta kedando cerca un omo pasobra a perde tur cos.
Hues a sera tratamento di e caso y a bisa cu 29 October 2021 lo tin sentencia.
