Caso asesinato na Jaburibari lo ta na November  2021

Corte Superior a fiha fecha - ORANJESTAD (AAN) – E homber Michael Gibson condena na 15 aña di prison pa asesinato di un Chines den un apartamento na Jaburibari,

su caso den apelacion a keda atendi pa di dos biaha pro forma den Corte Superior. Pero e biaha aki, Hof di Corte Superior a pone un fecha pa tratamento.  

   Recien, via video conference Hof a atende e di dos pro forma, mientras cu Gibson tabata den un oficina na KIA y Procurador General (PG) y abogado mr. Arendsz Marchena, tabata den un sala di Corte di Husticia.

APELA CASTIGO DI 15 AÑA DI PRISON

Na October 2019, Hues, den su sentencia, a bisa cu e ta haya legalmente proba cu Gibson riba 1 Mei 2017 a asesina e Chines H. Quach y tabatin un arma den su poder. Hues a rechaza abogado su ponencia cu e declaracionnan di testigonan no ta bisa e berdad y cu e testigonan a palabra pa declara contra Gibson. Hues a mustra cu e promer persona cu a wordo interoga pa Polis tabata e homber J. y su declaracion no a wordo divulga. Despues a bay scucha e otro testigonan. Hues no ta mira con por papia di a palabra pa declara contra Gibson. Hues tambe a rechaza e ponencia di abogado cu un otro persona lo a tira.

   Hues a bisa cu e ta haya Gibson culpable di a tira mata e Chines. Hues a tuma Gibson na malo pa e forma con a tira mata e Chines, cu ta un forma serio di asesinato. E asesinato aki a sacudi henter comunidad. Hues a bisa cu e ta sigui Fiscal su exigencia. Hues a condena Gibson na 15 aña di prison, kitando e tempo cu e ta sera den KIA.

   Gibson no ta di acuerdo cu e castigo y a apela. E tempo ey caba el a cambia di abogado y ta mr. Arends Marchena ta represent’e awor. 

CASO LO TA NA NOVEMBER

Hof di Corte Superior a dicidi cu tratamento di e apelacion di Gibson lo ta na November 2021. Ta asina dia di e promer pro forma, abogado mr. Arendsz Marchena a pidi Hof pa scucha un testigo cu ta na Canada. Ta asina cu Hues Comisario lo mester haci esaki caminda mester pidi asistencia di autoridad di Canada pa scucha e testigo. E tempo ey ainda esey no a sosode y pesey e caso tabata pro forma. Awor lo a haya reaccion di autoridad di Canada y Hof a stipula cu na November 2021, tratamento di e caso ta tuma lugar.