Dialuna como 5 sospechoso tin di presenta cu Paul Croes
ORANJESTAD (AAN): Manera cu DIARIO a trece dilanti caba, Dialuna dia 30 di Augustus 2021, Corte Superior lo trata e apelacion di caso IBIS, caminda 6 sospechoso lo mester presenta den Corte di Husticia. Na Januari 2021 tabatin e caso “regie” y Februari 2021, Hof di Corte Superior lo dicidi riba e peticionnan di abogadonan di Paul Croes. Promer a stipula September 2021 pa tratamento di e caso pero a cambia esaki pa Augustus 2021.
Ta asina cu di e 6 sospechosonan, 3 cu a worde declara liber. Manera ta conoci, Paul Croes a worde condena na 4 aña di prison. Ta asina cu Ministerio Publico a apela e sentencia mientras cu Paul Croes, su señora Melony Croes Paesch y señor Wever a apela e sentencia contra nan.
PETICIONNAN PA INVESTIGACION:
Den e “regie zitting”, e 3 Huesnan di Corte Superior cu ta forma e Hof, a duna oportunidad na e abogadonan di e 6 sospechosonan pa haci peticion pa investigacionnan cu nan ta desea.
E biaha aki Paul Croes ta worde representa pa mr. Sulvaran di Curacao y mr. Illes di Aruba. Di parti di e abogadonan aki a haci un serie di peticionnan por escrito na Hof y Ministerio Publico a haya copia di esakinan pa por reacciona.
Den sala Corte tabata presente abogado mr. Marchena cu a representa señor Di Vecchia, kende a worde declara liber pero Ministerio Publico a apela. Abogado mr. Lejuez a representa e dama Martinus, kende tambe a worde declara liber pero Ministerio Publico a apela. Tambe mr. Lejuez a representa señor Wever, kende a haya un multa y a apela.
Abogado mr. Oomen a representa e dama Nuñuez kende a worde declara liber pero Ministerio Publico a apela e sentencia. Abogado mr. Illes a representa Paul Croes y su señora Melony. Mr. Sulvaran tabata na Curacao.
E dia ey ni Di Vecchia, ni Wever a presenta, pero nan abogado si.
A CREA UN VIEWING-ROOM:
Mientras tanto, debi na e Decreto Ministerial nobo cu ta limita e cantidad di hende den un espacio, lamentablemente Corte lo no por tin espacio pa hendenan bay mira e tratamento di Caso IBIS di Corte Superior riba Dialuna awor. E ora a dicidi pa laga famianan so ta den Edificio di Corte, y a huur espacio na Piedra Plat Entertainment Center, unda hendenan interesa por bay mira un live video-feed di e caso di Corte.
Pero aki tambe espacio ta limita, pues ta first come, first serve. For di 30 di Augustus te cu 1 di September, por bay sinta eyden y mira e tratamento di e Caso bibo.
Nan ta pidi tur hende pa keda cu tapaboca bisti eyden di comienzo te fin, y pa mantene distancia fisico. E caso lo cuminza pa 9:30 am.
