ORANJESTAD (AAN) – Un pareha cu tin 15 aña cu otro y tin 3 yiu, awor e homber P. a presenta dilanti Hues pa a viola su ex pareha.
Fiscal a cuestiona e actitud di P. y a exigi 3 aña y 6 luna di prison. Ademas di e violacion, P. ta wordo acusa di a destrui bentana di e cas di mama di su pareha y tambe di a maltrata pusha e mama.
VIOLA
Hues a cuminsa cu e denuncia di e dama O. riba 14 April 2021. El a bisa cu tin 3 yiu cu P. y 4 luna promer el a kibra relacion. Dia 14 April 2021 e tabatin un cita cu notario atardi. Door di Covid e mester warda pafor relacion cu distancia social. Parando pafor P. a bay riba dje. Segun O., P. a gar’e na su braza y bis’e pa bay cun’e sino lo tin problema. O. a dicidi di bay cu P. y den auto, P. a puntra O. ki c… el a bay haci na notario. E tabata blo puntra O. pa su cellular. P., coriendo auto, tabata dal O. cu mokete na pia pa laga e tas los pa asina e por coy e cellular. Na dado momento P. a bisa cu awor O. ta bay h.. y a hib’e den vecindario di Sero Cristal. El a coy e cellular y tabata puntra O. pa code pa habri e cellular. Na dado momento P. a ordena O. pa habri su pia pa e controla si O. no tabatin relacion cu un otro homber. Despues di a controla, el a bisa cu awor e ta bay tin relacion sexual cu O. P. a ordena O. pa kita su carson sino lo maltrat’e. O. na yoramento a laga P. viol’e. P. despues di a tene relacion sexual cu O., a puntr’e kico lo bay pasa awor. O. a declara na Polis cu el a gaña P. cu e lo bay bek cun’e. Asina ey P. a hib’e bek na notario y a warda O. subi su auto y sigui su tras pa bay cas di O. su ruman muher. Na e cas, O. a sera porta pa P. E ruman muher di O., a constata cu O. tabata maltrata y a sali pafor cu un palo di golf pa P. E ora P. a bay y nan a yama Polis. A hiba O. na un clinica pa determina con el a wordo maltrata y abusa. A constata manchanan blauw na pia di O. E ruman muher a bisa cu el a mira su ruman muher O. su cara tur cora y O. a cont’e kico tur P. a haci.
SOSPECHOSO TA NENGA
Hues a bisa cu P. ta nenga di a forza O. pa tin relacion sexual cun’e. El a bisa cu nan a palabra pa topa cu otro na notario pa papia riba e cas. Eynan el a puntra O. cu ken e tabata papia. Segun P. nan tin 15 aña cu otro y nan tin 3 yiu. El a bisa cu el a mira O. su auto para dilanti cas di un guy na Dakota. E tabata sospecha cu O. tin relacion cu otro homber. Segun P., O,. tabata bisa cu nan relacion a kibra pero nan tabatin relacion sexual normal. Segun P., algun dia promer el a mira O. serca e guy caba. E tabata kier a papia cu O. pa clarea e situacion entre nan. Den auto el a puntra O. si e tabatin relacion cu un otro homber. P. a bisa cu e kier a mira den cellular di O. y door cu O. no kier habri e cellular, el a pasa O. un wanta na cabez y despues tabata dal O. cu mokete na su pia. El a bisa cu a bay Sero Cristal y ora el a check cu O. a tene relacion cu otro, el a dicidi di tene relacion sexual cu O. Segun P., e no a ranca paña y nada. El a bisa cu O. no a resisti. Despues el a puntra kico lo bay pasa awor y O. a bisa cu nan ta cuminsa di nobo pero loke a pasa promer ta keda lubida. O. a bis’e pa hib’e na su ruman muher pa e coy su pañanan. E ora ey O. a keda na e ruman muher kende a sali cu un palo di golf p’e.
SCUCHA VICTIMA COMO TESTIGO
Hues a scucha O. como testigo. O. a bisa Hues cu tur loke el a declara na Polis ta asina. Hues a pidi O. pa conta tur loke a pasa y O. a conta con P. tabata dal’e den auto y a hib’e Sero Cristal caminda P. a viol’e. Segun O. ora cu P. tabata sera na KIA, el a whatsapp O. y bis’e masha danki. O. a bisa cu diferente biaha P. tabata mand’e mensahe riba facebook, instagram. Cada biaha e tabata blokea pero P. tabata usa otro cellular. Hues a remarca cu P. a mustra cu via cellular tabatin sex. Segun O. esey ta potretnan bieu cu P. a saca screenshot. El a nenga cu ta ora cu P. ta sera den KIA esey a sosode. Segun O., P. a manda esakinan pa e guy cu e ta cun’e. Ta asina cu nan tin 3 yiu y O. a bisa cu e no kier tin nada mas cu P. El a bisa cu e no tin problema pa tin contacto pa cu e yiunan.
MALTRATO
Hues a mustra cu segun relato di Polis, dia 5 Januari 2019, anochi despues di fakkel, tabatin problema na cas di mama di O. E mama a declara na Polis cu su yiu muher O. a core drenta camber di mama y a bisa cu P. kier dal’e. E mama a para meymey di nan pero P. a pusha e mama y el a cay. E mama a bisa cu e no sa si P. a trapa riba dje pero e tabatin macha blauw na su pia. E mama a bisa Polis cu el a mira P. maltrata su yiu. E yiu O. a bisa cu P. a drenta via bentana di camber cu e lo a forza. E mama a bay pafor y mira cu tin un lata di palo di e bentana benta abao.
Dia 22 Januari 2019, O. a bay busca e yiunan na cas di mama di P. E mama di P. a declara cu mientras cu e tabata cu e yiunan y un di nan den su brasa, P. a drenta e cas rabia y nan a cuminsa bringa cu otro. El a manda nan pafor di cas. Tin un relato di dokter di 23 Januari 2019 cu ta papia di manchanan blauw na man y tambe sla na cashi di wowo.
Hues a mustra cu riba carchi di castigo di P. tin un caso na 2017, P. mester a cumpli cu condicionnan di Hues Comisario relaciona cu maltrato. E mester a sigui cu curso pa regula agresion. Na 2019 tabatin un otro caso di maltrato cu amenaza.
DEMANDA DAÑO
Abogado mr. Croes a representa O. y a exigi 5 mil florin di daño inmaterial. Esaki pasobra O. a keda cu trauma y e muchanan a mira con P. a maltrat’e. Tambe tin gastonan di asistencia di abogado.
EXIGENCIA DI FISCAL
Fiscal a bisa Hues cu e ta haya legalmente proba cu P. a viola e dama O. cu violencia riba 14 April 2021. Na opinion di Fiscal, P. mes ta admiti di a dal O. na cabez y pia. Tambe P. a bisa cu nan tabatin relacion sexual.
Fiscal a remarca cu por mira e mesun comportacion di P. na 2019, ta ripiti dia 14 April 2021. El a mustra cu na 2019, P. a kibra e bentana di cas di mayor di O. y a maltrata O. dilanti su mama. Dia 23 Januari 2019, tabatin otro caso di maltrato di O. Tur e maltratonan aki ta relaciona cu e hecho cu P. ta pensa cu O. tin relacion cu otro. Fiscal a mustra cu e mama P. a remarca cu P. ta kere cu O. ta su propiedad. Fiscal ta haya cu P. ta kere cu e tin dominio riba O. Pa loke ta demanda di daño, Fiscal ta haya cu e ta hopi fastioso pa determina un suma pa un dama cu a keda afecta. E ta haya cu e suma di 5 mil florin, pa un dama cu a wordo viola ta acceptable.
Pa cu castigo, Fiscal a tene cuenta cu e carchi di castigo di P. cu ta mustra cu P. ta un recidivista pa maltrato. Fiscal ta haya cu ta parce cu e curso di regula agresion no a yuda. Fiscal ta haya cu mester duna P. un señal bon cla cu e no mester acerca e dama O. mas. E ta kere cu via abogado lo mester regla pa cuestion di e yiunan. Fiscal a exigi 3 aña y 6 luna di prison di cual 10 luna ta condicional cu un tempo di prueba di 2 aña. Fiscal tambe a exigi pa prohibi P. di tin contacto cu e dama O. Hues, despues di a scucha abogado, a bisa cu e ta bay studia e caso y dentro di algun siman por spera sentencia.
