Ainda e investigacion ta andando
ORANJESTAD (AAN): E sospechosonan den e caso di asesinato cruel di e miembro di CEA, Sergio Maduro, a presenta dilanti Hues pa e caso pro forma. E sospechosonan ta Bryan Jimenez (28) y Jennifer Gonzalez (39), kendenan a drenta den sala di Corte cu man y pia na boei. Por a mira cu e tata di e victima a presenta y a laga sa cu e kier busca abogado pa haci demanda di daño.
ASESINATO CRUEL
E acusacion contra Gonzalez y Jimenez ta cu riba bispo di Pasco, 24 December 2023, a choca Maduro cu forza y despues draai su nek varios biaha di robez pa drechi. Tambe nan a cera Maduro su garganta cu forza y despues push’e bent’e for di e auto.
Despues nan a pasa auto riba Maduro diferente biaha. Ta sospecha cu Gonzalez cu tabata e pareha di Maduro, a pidi Jimenez di mata Maduro door di primintie pago y a paga un adelanto tambe.
PSICOLOGO Y PSYCHIATER LO EVALUA
Fiscal a propone na Hues pa e tratamento di e caso tuma lugar dia 6 di September 2024, henter dia. Fiscal a bisa tambe cu lo bay manda un invitacion oficial pa e tata di e victima, pa e ta presente den Corte. Ta asina cu e tata a bisa cu riba facebook el a lesa di e caso y a dicidi di bay Corte sin cu el a haya invitacion pa esaki. Esey a pone cu awor Fiscal lo percura pa e tata haya invitacion pa ta presente pa haci demanda di daño y tambe lo por expresa su mes riba e forma cruel cu a asesina su yiu homber.
Fiscal a bisa Hues cu ainda e investigacion ta andando. Abogado di Gonzalez, mr. D.Croes a bisa Hues cu su cliente ta un persona special y ta pidi pa laga haci investigacion pa determina si e por a planea e asesinato manera ta acus’e di dje.
Fiscal a bisa cu tin un raport di psychiater riba Jimenez y cu tin un psicologo cu lo bay evalua Gonzalez y esey lo por duna splicacion.
LO TRATA CASO NA SEPTEMBER
Hues despues di a scucha Fiscal y abogado mr. D.Croes, a bisa cu e ta pospone e caso pa dia 6 di September 2024 cuminsando 8.30 di mainta.
