ORANJESTAD (AAN): E homber Colombiano J.A.Z.R.(38), kedando ilegal na Aruba, ayera mainta a presenta dilanti Hues pa e caso penal cu Ministerio Publico a cuminsa contra dje.
El a admiti di a pidi un otro persona hiba e caha cu slofnan Postkantoor y e cacho di Douane a reacciona riba e caha. Fiscal a exigi 24 luna y Hues a condena J.A.Z.R. na 18 luna di prison.
E acusacion cu Fiscal a presenta contra J.A.Z.R. ta cu entre 1 di November 2023 te 1 di December 2023 hunto cu otronan a exporta y tabatin den posecion cocaina.
Exporta cocaina: Riba pregunta di Hues, J.A.Z.R. a admiti y a bisa cu el a haci un fayo grandi di exporta droga. Hues a mustra cu segun e raport di Douane, dia 1 December 2023 a haci control di rutina riba paketenan di post na Postkantoor y cacho anti droga a reacciona riba un pakete. E pakete tabata destina pa Australia.
Den e pakete tabatin 8 paar di slof cu tabata pisa mas cu normal. A bora un slof y a constata cu tin cocaine den e zool. A entrega nan na Polis. Investigacion a mustra cu den zool di e slofnan en total a confisca 795 gram di cocaina. A detene e persona A.v D. cu su nomber tabata skirbi riba e pakete. Hues a puntra J.A.Z.R. pakico el a manda A.v D. y no e mes a bay hiba e pakete. J.A.Z.R. a bisa cu el a conoce A.v D. na trabao y el a pidi A.v D. haci’e e favor pa manda e pakete. E no a bisa A.v D. cu tin droga den e pakete.
Haya cocaina na cas: Despues di basta investigacion Polis a yega na e apartamento di J.A.Z.R. caminda a haya 50 gram di cocaina. J.A.Z.R. a bisa cu e droga ta di dje. Durante interogacion na Polis, el a bisa cu un hende di Cali, Pipe, a pidie manda un pakete cu slofnan cu ta yena cu cocaina. Segun J.A.Z.R. el a djis haci un favor y no a pidi ni a haya placa. Hues a haya esaki straño. J.A.Z.R. a bisa cu el a pensa cu den futuro e lo por pidi.
Hues a bisa cu A.v D. a bisa cu J.A.Z.R. a primintie 300 florin pero solamente a paga 150 florin. Segun J.A.Z.R. un latino cu tabatin e pakete, a dun’e e pakete y 300 florin pa paga e post. E placa cu A.v D. a haya ta loke a resta di loke cu e mester a paga pa manda e pakete Australia.
Fiscal: Fiscal a bisa cu e ta haya legalmente proba cu J.A.Z.R. a exporta cocaina. El a mustra cu tin declaracion di A.v D. y J.A.Z.R. cu ta bisa di a exporta cocaina. Ademas a haya e 795 gram den e slofnan mas e 50 gram na cas di J.A.Z.R. cu ta bira mas o menos 850 gram. Pa cu e castigo, Fiscal a bisa cu e ta tene cuenta cu droga ta malo pa salud y comunidad en general. El a bisa cu Ministerio Publico no kier pa ta exporta droga for di Aruba.
El a mustra cu J.A.Z.R. ta ilegal na Aruba pa un mihor bida y ta haci su mes culpable pa un delito serio. Fiscal ta considera J.A.Z.R. un intermediario den e traficacion y Pipe ta e cabez cu ta organiza esaki. Fiscal a exigi 24 luna di prison. El a bisa cu despues di caba di sinta su castigo, J.A.Z.R. lo wordo saca for di Aruba.
Abogado: mr. Carlo a bisa cu J.A.Z.R. a admiti y ta castigabel. El a mustra riba e preguntanan di Hues y Fiscal, con por haci favor asina, el a splica cu J.A.Z.R. a bin Aruba pa traha. E tabata traha di mainta te atardi y despues anochi. Den esey un persona di Cali cu sa cu J.A.Z.R. ta na Aruba, a busca un chens. E abogado a bisa Hues cu J.A.Z.R. a bay purba su suerte y tabata bobo pa haci’e. El a bisa cu e famia di J.A.Z.R. ta hopi sera y e tata a bin special di Colombia pa sostene su yiu. E abogado a pidi Hues pa duna un castigo combina. Segun e abogado, si duna un parti condicional, J.A.Z.R. lo bay Colombia y lo bay regla su papelnan pa por bin legal Aruba. E ora ey e tin presion riba su cabez di castigo condicional cu e no por faya mas.
Sentencia: Hues a sera tratamento di e caso y a bay pensa un rato promer cu e tuma un decision. Despues di un rato, Hues a bolbe y a dicta sentencia di biaha. Hues a bisa cu e ta haya legalmente proba cu J.A.Z.R. a exporta cocaina y tabatin 50 gram den su poder. Pa cu e castigo, Hues a bisa cu e ta tene cuenta cu seriedad di e caso, e acusado ta ilegal na Aruba, ta promer biaha cu e ta cay sera. Hues a bisa cu droga ta malo pa salud y ta causa criminalidad. Hues a bisa cu e ta tuma J.A.Z.R. hopi na malo cu a envolvi un hende inocente den esaki.
Hues a bisa cu ta dificil pa e kere cu J.A.Z.R. no a haya pago pa haci esaki. Hues no ta haya cu mester duna castigo condicional. Hues a condena J.A.Z.R. na 18 luna di prison, kitando e lunanan cu e ta sera den KIA.
