ORANJESTAD (AAN): Awe merdia e homber Anderson Rasmijn, sospechoso asesino di John Anthony Castro, lo presenta dilanti Hues di Corte di Husticia di Aruba.
CLARIDAD DESPUES DI 10 AÑA
E asesinato di John Castro, q.e.p.d. riba 22 December 2010, a conmove henter comunidad. John 'Poentje' Castro tabata un persona hopi conoci den comunidad, no solamente pa su programa na Tele Aruba, sino tambe pa a toca den agrupacion di Gaita y tambe Brassband.
Durante 10 aña, e famia di John Castro a keda den incertidumbre kico realmente a pasa cu nan ser keri, tata di famia John Castro.
Tabata circula hopi rumornan pero ningun sospechoso a wordo deteni y ningun di e rumornan a keda confirma. E aña aki, despues cu a forma un team dinamico, detencionnan a cay.
A HABRI INVESTIGACION
Vocero di Ministerio Publico, dia 20 di April 2021 a informa prensa cu un team di Cuerpo Policial di Aruba, riba peticion di Ministerio Publico, a traha riba un revision di e investigacion cu a tuma lugar na 2010. E revision aki ta carga e nomber “Apollo”.
E revision di e investigacion a hiba na puntonan di referencia concreto pa mas investigacion y esaki a pone cu Ministerio Publico a dicidi pa cuminsa un investigacion nobo.
PROMER DETENCION A CAY
Despues cu Ministerio Publico a publica pa hendenan yama e tiplijn 11141 y cu nan lo keda anonimo, e team a cuminsa haya informacionnan. A sigui algun luna di investigacion hermetico y dia 6 di September 2021, e homber G.M. a wordo deteni como sospechoso envolvi den e asesinato di John Castro.
DI DOS DETENCION
Algun dia despues, dia 9 September 2021, Ministerio Publico ta notifica cu a detene den e caso “Apollo” e di dos sospechoso, K.J.G.M.
Dia 14 di September 2021, Ministerio Publico a informa cu a laga e promer sospechoso G.M. liber pero e ta keda sospechoso.
Tres dia despues, 17 di September 2021, Ministerio Publico a informa cu Hues Comisario a prolonga e detencion di e sospechoso K.J.G.M.
A HAYA ESUN CU A TIRA
Investigacion a sigui y a bin resulta cu e sospechoso cu a tira John Castro, Anderson Rasmijn, ta sera den KIA relaciona cu un caso di atraco.
Dia 9 September 2021 a detene Rasmijn como e sospechoso cu a tira John Castro riba 22 December 2010 mata.
AWE SOSPECHOSO DILANTI HUES
Awe merdia 2’or Rasmijn, acompaña pa abogado mr. Carlo, ta presenta dilanti Hues di Corte di Husticia. E ta wordo acusa di intencional y premedita riba 22 December 2010 a tira John Castro varios biaha den pecho y cabez cu consecuencia cu John Castro a fayece. E lamentable asesinato cruel aki a sosode na cas di mayornan di John Castro caminda e tabatin su oficina. John Castro a wordo haya patras den cura di e cas benta abao sin bida.
DIARIO por a compronde cu awe Hues lo no trata e caso. E lo ta pro forma. Esey ta nifica cu lo bay fiha un fecha caminda tratamento di e caso lo tuma lugar.
DIARIO lo informa lectornan tur loke a sosode den sala di Corte di Husticia.
