A busca un sicario di Venezuela pa haci e trabao --- ORANJESTAD (AAN): Hof di Corte Superior a dicta sentencia den a apelacion di e homber M.T., contra su condena di 10 aña di prison.
Tratamento di e apelacion a tuma lugar dia 23 November 2021 y Hof a palabra cu December 2021 lo tin sentencia.
BUSCA SICARIO PA ASESINA HENDE
Na October 2020 tabatin sentencia di e caso. Durante tratamento di e caso, Fiscal a baha pisa riba e homber sicario Venezolano L.P.O. y e homber Arubiano M.T. kendenan ta wordo haya culpable di a planea asesinato di e homber K.R. na Aruba. E sicario a wordo hiba prison na Bonaire pa motibonan di seguridad. Fiscal a mustra cu accion di biaha di Recherche a pone cu e asesinato no a sosode. Na e cas unda M.T. tabata, a haya un Uzi y tres arma di candela. Promer a detene e sicario, kende Recherche tabata scucha su combersacionnan. L.P.O. lo a wordo ofreci 5 mil Euro pa mata K.R. y cu e lo haci haya armanan for di M.T. y un auto. E sicario lo a papia cu e cabezante di un organizacion poderoso den Caribe, kende ta bibando na Hulanda. E palabracion tabata cu L.P.O. lo haya estadia pa 1 siman paga den un hotel y cu auto. M.T. lo mester a percura pa e armanan cu L.P.O. lo a usa.
Recherche a haya den e cellular di e sicario, mensahenan whatsapp cu M.T., kende ta e intermediador kende tabatin e armanan na Madiki. Den un cas container, Arestatie Team a haci investigacion y a detene M.T. y a confisca un mini Uzie MAC, un revolver Ranger MR Cal. 38 Special, un pistol Glock 26 y un pistool 9 mm. Tambe a haya un cantidad di droga y placa.
CASO DI HIT DI DROGA Y MENAZA
Fiscal a bisa Hues cu Polis a bay papia cu K.R., kende ta sospecha di lo ta meti den droga y aparentemente lo a hit un cargamento di droga cu tabata destina pa Hulanda. Lo tabatin menazamento den un bar cu arma na Januari 2020 riba un tal R. y R. a bisa M.T. cu el a wordo menaza. Despues K.R. ta haya menaza cu sicario tin su potret. Despues ta haya combersacion di e cabezante di e organizacion poderoso cu e sicario L.P.O.
Fiscal a splica cu a detene R. pa interogacion pero no tabatin suficiente prueba pa e keda encarcela.
CASTIGO
Hues a dicta sentencia pa tanto e sicario L.P.O. na Bonaire como M.T. den KIA. Hues ta haya legalmente proba cu tabatin un preparacion pa asesinato di e homber K.R. Hues a mustra cu no ta tolera delitonan asina na Aruba.
Pa cu M.T., Hues ta haya legalmente proba cu e tabata e persona di contacto y cu e tabatin un Uzi y tres ora arma na su cas, mas un cantidad di 500 pilder di XTC, 1 kilo di cocaina y 3.5 kilo di marihuana. Hues ta haya e castigo exigi pa Fiscal na su lugar y ta condena M.T. na 10 aña di prison. Hues a ordena pa destrui e droganan y saca e armanan for di circulacion.
Pa cu L.P.O., Hues ta haya legalmente proba cu el a wordo acerca pa mata un persona y cu el a accepta pa haci esaki. Hues a baha e castigo un poco pa L.P.O. y a conden’e na 6 aña di prison.
SENTENCIA HOF
Hof ta haya legalmente proba cu M.T. tabata e intermediador entre e sicario L.P.O. encarcela na Bonaire y e cabezante di e organizacion poderoso na Hulanda.
Hof den su sentencia ta mustra cu ta tene cuenta cu M.T. a yega di haya condena pa caso similar esta posecion di arma di candela y droga.
Hof a confirma e sentencia di Corte den Promer Instancia y a condena M.T. na 10 aña di prison, kitando e tempo cu e ta sera den KIA.
