Abogado mr. Carlo kier pa psikiatra evalua estado mental di sospechoso
ORANJESTAD (AAN): Manera DIARIO a publica, diabierna merdia 2’or a trata e caso pro forma di e sospechoso di asesinato di John Anthony (Poentje) Castro, q.e.p.d. Despues cu abogado mr. Carlo a mustra cu el a pidi pa haci un investigacion riba e estado mental di su cliente, Fiscal a propone pa 25 Maart 2022 e tratamento di e caso tuma lugar. Asina ey ta duna tempo suficiente pa e investigacion pidi pa mr. Carlo por sosode.
E sospechoso Anderson Rasmijn di Colombia, tabata sinta den un oficina na KIA, mientras cu den sala di Corte di Husticia tabata presente, famia di John Castro, abogado mr. Carlo, Hues, Fiscal y un traductor cu tabata traduci pa e sospechoso y tambe pa Fiscal.
CASO PRO FORMA
Hues a bisa cu e motibo cu e caso ta pro forma ta pasobra cu ainda e procesverbaal oficial di Recherche no ta cla. Esey acusa di a tira mata John Anthony Castro riba 22 December 2010. Den sala di Corte tabata presente e famia di defunto Castro. Hues a bisa cu ainda e procesverbaal oficial di Recherche no ta cla.
PSYCHIATER MESTER EVALUA SOSPECHOSO
Abogado mr. Carlo a bisa Hues cu for di comienso, el a pidi pa un psikiatra determina si Rasmijn ta compronde kico ta e acusacionnan contra dje. E abogado a bisa cu tin un peticion pa haci investigacion y pa Corte nombra un psikiatra pa haci e investigacion. Hues a bisa cu entretanto Hues Comisario a nombra un psikiatra. Esaki a sosode riba 15 December 2021, caminda e psikiatra awor lo bay investiga Rasmijn.
ABOGADO KIER PA STOP INVESTIGACION
Abogado mr. Carlo tambe a bisa Hues cu a base di ley door cu no a determina e estado mental di Rasmijn, mester laga Rasmijn liber. Fiscal a bisa cu tanten cu e investigacion ta andando no por para investigacion. El a mustra cu na Hulanda tabatin un caso caminda a sigui cu e investigacion te ora cu e raport di psikiatra a keda cla caminda a dicidi cu no ta sigui mas cu e caso. Fiscal ta haya cu mester sigui e mesun procedura. Fiscal a bisa cu mester di basta tempo pa trata e caso. El a propone 25 Maart 2022. Fiscal a bisa cu teniendo cuenta cu e investigacion, Hues lo mester manda e caso pa Hues Comisario pa asina e deseo di abogado mr. Carlo, keda realisa. Asina e psikiatra no tin ningun duda kico lo mester haci.
CASO TA SIGUI MAART 2022
Hues despues di a scucha e punto di bista di mr. Carlo y Fiscal a dicidi cu lo pospone e caso pa dia 25 Maart 2022 caminda lo trata e caso. Hues a fiha cu 16 Februari 2022 lo tin un caso pro forma pa asina sa si ya tin un raport di psikiatra y kico lo mester haci.
