Hues a keda asombra y a bisa Fiscal cu mester haci algo
ORANJESTAD (AAN): Recien den sala di Corte di Husticia, Hues a keda asombra cu e expresion di un acusado, kende a bisa cu e ta usando droga den KIA. Durante tratamento di e caso penal contra un acusado, el a bisa Hues cu e ta usa marihuana den KIA y cu tur hende den KIA por haya droga. Pa proteha e acusado aki, no ta publica su nomber.
IREGULARIDADNAN DEN KIA
Pa añas personal di KIA ta hibando un lucha contra e traficacion di droga den KIA. Ta un secreto publico cu droga ta yega den KIA den un forma of otro. A pone mas vigilancia y esey a conduci na cu varios biaha a gara persona(nan) cu a purba pasa droga den KIA. A yega di haya balanan cu personanan ta tira over di muraya di KIA. A gara personanan cu a bay bishita preso den KIA y tambe a yega di gara cuidador(nan) di preso cu a pasa droga. Cierto cuidador(nan) di preso ta wordo cumpra pa hiba droga den KIA.
Ademas di droga, tin celularnan cu ta circula den KIA. Investigacionnan di sorpresa cu a haci den KIA, a duna resultado. A haya celularnan den celnan di presonan. Aki tambe tabatin caso cu a gara cuidador(nan) di preso cu ta haci esaki pa e placa cu nan ta haya.
Awor hasta cachonan K9, personal di KIA ta dispone di dje y unidadnan special entrena pa atende cu situacionnan cu sa presenta den KIA. Aparentemente tur e esfuerzonan aki ainda no ta suficiente, pasobra tin indicacion cu droga y cellular ta sigui circula den KIA.
DROGA DEN KIA
Ta increibel cu un preso ta presenta dilanti Hues pa responde pa e delito cu el a haci y durante tratamento di e caso e ta bisa Hues cu e ta usando marihuana den KIA y cu tur hende por haya droga den KIA. Hues a keda sombra cu e declaracion di e acusado. El a bisa Fiscal cu mester haci algo cu e situacion aki.
Esaki ta otro alarma cu Hues ta bati den direccion di KIA pa caba cu e situacion aki.
Por bay spera cu investigacionnan pisa lo bay tuma lugar den KIA y detencionnan lo bay cay pa esnan cu ta presta nan mes pa hinca droga y cellular den KIA.
