Ademas di a exigi pa e 6 mil dollar keda confisca
ORANJESTAD (AAN): E homber G.D.V.(26) acusa di bendemento di droga a scucha Fiscal exigi 2 aña y 6 luna di prison y cu e casi 6 mil dollar cu a haya den e cas lo keda confisca.
E acusacion cu Fiscal a presenta den Corte contra G.D.V. ta cu entre 1 Januari 2017 te cu 2 September 2021, e tabata bende y tabatin marihuana y pildernan XTC.
BENDE DROGA DEN TEMPORADA DI COVID
Hues a puntra G.D.V. si ta berdad. G.D.V. a bisa Hues cu den periodo di Covid el a perde trabao y no por a haya trabao mas. El a cuminsa bende marihuana. El a bisa cu algun luna promer cu el a cay sera, el a cuminsa bende XTC. El a admiti cu durante 2019 y 2021 el a bende marihuana. Segun G.D.V., promer cu esey, e no tabata activo ta bende. El a bisa cu e tabata cumpra marihuana pa propio uso y ta comparti cu amigo. Hues a mustra cu Polis ta mustra cu na 2017 via messenger hendenan busk’e pa droga. Hues ta haya cu G.D.V. tabata bende na 2017 aunke cu G.D.V. ta bisa cu e no tabata activo. G.D.V. a admiti di tabata bende XTC y tabata us’e tambe. Hues a puntra G.D.V. si e tin problema cu droga. G.D.V. a bisa cu e ta usa marihuana. Ta asina cu G.D.V. a wordo deteni na Miami. E tabatin 6 mil dollar. Segun G.D.V. e tabata haci tattoo. El a bisa cu ora e sali e lo bay Hulanda.
EXIGENCIA FISCAL
Fiscal a bisa cu e ta haya legalmente proba cu G.D.V. entre 1 Januari 2017 y 2 September 2021, e tabata bende marihuana. El a mustra cu tabatin combersacionnan riba facebook. Tin 11 hende a bisa di a cumpra for di G.D.V. Fiscal a bisa cu e no ta kere cu G.D.V. tabata comparti marihuana sino a bende. Pa loke ta 30 pildernan di XTC, Fiscal ta haya cu G.D.V. tabata bende durante 1 luna. El a mustra cu durante 4 aña y 6 luna G.D.V. a bende marihuana. Esey ta hopi tempo y droga ta causa hopi miseria den famia y ta causa criminalidad den comunidad. Fiscal a remarca cu no ta promer biaha cu G.D.V. ta cay sera pa droga.
Pa cu e castigo el a mustra cu si tabata hard drugs lo por a spera castigo mucho mas halto. El a exigi 2 aña y 6 luna di prison. E droganan mester wordo destrui. E casi 6 mil dollar lo mester keda confisca.
ABOGADO
Mr. Illes a bisa Hues cu ta un hecho cu G.D.V. tabata bende droga pero no durante e periodo cu ta acus’e. E ta haya cu promer cu e periodo di Covid, G.D.V. no tabata bende. El a pidi Hues pa tene cuenta cu e periodo aki. Na opinion di e abogado, no ta asina cu ta 4 aña y 6 luna a bende. Tambe el a pidi pa tene cuenta cu G.D.V. tabata bende marihuana y pa un periodo cortico a bende XTC. G.D.V. ta conciente cu el a haci malo. E abogado ta kere den un castigo combina pa asina forza G.D.V. stop. El a bisa Hues cu e 6 mil dollar a wordo haya ora G.D.V. a bolbe for di Miami y no por relaciona esaki cu droga.
Hues a sera tratamento di e caso y a bisa cu 17 Maart 2022 lo tin sentencia.
