Despues di a scucha testigonan- ORANJESTAD (AAN): Manera DIARIO a publica, diamars mainta Corte Superior a trata e apelacion di e ex agente di Polis,
Rasmijn, contra su condena. Den edificio di Corte tabata presente Nelson de Andrade (Speed), Marko Espinoza, ex inspector di Polis B.Winklaar y un ex agente di Polis Dirks. Hof a scucha cada un di e testigonan separa.
SCUCHA TESTIGONAN
Promer testigo ta Winklaar tabata Inspector di Polis. El a bisa cu tabata un berguenza loke a sosode na BIZO. El a bisa cu promer na cuminsamento lo tabatin bruhamento di radio na 2015 pero despues a regla esaki caminda a yega formulario cual agente tin cual radio. Na dado momento un cargador di radio a disparce. Despues e asunto a bira mas serio ora cu un radio a disparce. Winklaar a bisa cu su ruman A.Winklaar cu ta Polis a haci keho di a perde radio y cargador. Ta asina cu un a keda sin bisa cu e cargador ta perdi. A bay busca e formulario di e cargador, pero a resulta cu esaki tambe a disparce. Ta un berguenza cu esaki a sosode. Na dado momento ora cu tabata sinti falta di radio, el a drenta e oficina di Rasmijn riba orden di Comisario di Polis.
SPEED TA DESMENTI
Nelson de Andrade a presenta y su abogado mr. Lejuez, kende tabata sinta patras. Hof a bis’e pa pensa bon kico e ta papia y no bisa cos djis pa bisa. Nelson de Andrade a bisa cu recien a hala e apelacion aden pasobra e no tin tempo pa esey. Hof a bisa cu esey ta nifica cu e ta bay di acuerdo cu e sentencia. Speed a bisa cu e no kier bringa cu husticia. Hof puntr’e pakico cada vez durante investigacion a haci uso di derecho di silencio. Speed no a contesta pero a bisa e no kier tin problema cu Ministerio Publico. Speed a bisa cu e ta amigo cu Rasmijn pero pa hopi tempo no ta papia cun’e. E no sa si Rasmijn ta su amigo ainda. El a bisa cu door di e caso, nan no ta papia cu otro. Hof a mustra cu Marko a papia riba Speed. Speed a bira nervioso y Hof a hala su atencion pa scucha bon. Hof a mustra cu Marko a bisa cu na 2015 – 2016 el a haya un radio di Polis y cargador for di Speed pa scucha Polis y na 2018, Speed a bisa Marko pa hiba e radio pa Rasmijn. Ariba esaki, Speed a bisa cu e no ta corda. El a desmenti di a duna Marko radio y dun’e orden pa hiba pa Rasmijn. Hof a remarca cu e ora ey ta Marko ta gaña?
MARKO TA BISA CU TA SPEED A MAND’E
Marko Espinoza a bisa cu como periodista e conoce Rasmijn relaciona cu Harley Davidson caminda a haci un entrevista cun’e. Hof a mustra cu e hecho cu Marko a hala e apelacion aden kiermen cu e ta di acuerdo cu e castigo cu el a haya. El a bisa cu henter e caso aki ta un asunto politico y no ta di acuerdo cu el a wordo castiga. Hof a mustra cu for di investigacion ta mustra cu tur cos ta drei rond di Marko. El a bisa cu na principio e no kier a bisa nada pero despues cu el a papia cu su abogado mr. Lejuez, el a dicidi di papia e berdad. Hof a mustra cu Marko a declara na Polis di a haya e radio y cargador for di Speed na 2015 – 2018 pa scucha Polis. Na Januari 2018, Speed a bis’e pa hiba e radio y cargador na Rasmijn. Speed a dune number di Rasmijn.
Rasmijn a puntra Marko si el a mira Speed dun’e un radio. Marko a bisa cu no. PG a bisa cu Marko a bisa cu e tabata sa cu e radio ta di Rasmijn. Segun Marko, esey lo ta un conclusion cu el a tuma door di e investigacionnan. Pero e no sa cu e radio ta di Rasmijn. Hof a mustra cu Patrick Paskel a yama de Jong ora Marko tabata sera pa busca algo na Marco su cas. Den e saco tabatin un otro radio di Polis.
RASMIJN TA LAMENTA
Rasmijn despues di a scucha e testigonan y nan a sali for di sala di Corte, a bisa Hof cu aparentemente Speed tabatin diferente radio. E ta lamenta cu Speed no a bisa con el a yega na e radionan. Pa loke ta Marko, Rasmijn ta lamenta cu Marko no a bisa e berdad. Rasmijn a bisa cu nunca el a duna ni acepta radio for di Marko. Tambe el a bisa cu loke Winklaar bisa no ta berdad. Segun Rasmijn, no ta berdad loke Winklaar a bisa cu e mix up tabata entre Rasmijn y Dirksz. E mix up tabata entre Winklaar, Rasmijn y un otro colega.
