ORANJESTAD (AAN): Diahuebs mainta Hues di Corte di Husticia a condena e homber L. pa malversacion di mas cu 61 mil florin.
Hues a confirma un parti di e exigencia di Fiscal pero no a honra e demanda di parti di Censo. Hues ta haya cu segun ley, Gobierno mester a autoriza un persona pa papia den nomber di Gobierno, cual den e caso aki no a sosode. Esey ta haci cu Hues a declara e demanda di mas di 61 mil florin no admisible y a bisa cu Gobierno lo por cuminsa un caso civil.
Algun siman pasa tratamento di e caso a tuma lugar caminda e ex empleado di Censo, L. a wordo acusa cu entre 1 April 2018 y 2019, el a malversa placa na Censo.
- a admiti dilanti Hues cu el a coy placanan na Censo. Hues a puntra pakico L. a haci’e. Segun L. e tabatin debenan y su entrada no tabata suficiente. Ora cu na 1 April 2018 e hefe di control no tabata bin mas, el a tuma e chens. Segun L., e pensamento tabata pa pone e placa bek pero e no tabata gana placa cu e gamble den casino. Asina a sigui pa basta tempo te cu na 2019 a bin otro persona cu a controla y a constata cu L. a malversa 61.615,00 florin.
Abogado mr. Emerencia a puntra si L. ta kere cu e ta adicto na gamble. El a bisa cu si. El a bisa cu e ta dispuesto pa haya guia riba esaki.
DEMANDA
Un hurista di Censo a demanda 61,615 florin. El a bisa Hues cu empleadonan di Censo a keda den shock cu e caso aki. El a bisa cu L. tabata un hopi bon empleado. E ta haya cu L. a abusa di a confianza cu a pone den dje. Por a nota cu L. a cuminsa yora. Fiscal ta spera cu L. realisa cu su adiccion na gamble a perhudike.
FISCAL
Fiscal a bisa cu ta hopi placa a malversa di comunidad. E problemanan financiero no a pasa ainda. E placa cu a malversa mester paga bek. E ta haya cu L. mester di tratamento pa su adiccion. Fiscal a bisa cu mester manda señal bon cla cu esaki no por. Si ta horta placa di Gobierno, tin castigo pisa. Fiscal a exigi 6 luna di prison condicional cu 3 aña di prueba. Tambe Fiscal a exigi 200 ora di trabou pa comunidad. E ta haya cu por aproba 50 mil florin segun ley. Fiscal a exigi pa pone e medida di pago y si L. no paga e lo mester bay 1 aña di prison. E resto di placa, Censo lo por demanda den un caso Civil.
SENTENCIA
Hues a bisa cu e ta haya legalmente proba cu L. a malversa 61.615 florin for di Censo. Pa cu e castigo Hues a tene cuenta cu ta promer biaha cu L. ta cay den man di husticia. Hues a tene cuenta cu seriedad di e hecho. Door di adiccion di gamble, L. a causa basta daño na Censo. A abusa di e confianza di empleadonan di Censo. Hues a tene cuenta cu L. a admiti y splica tur cos.
Hues a confirma un parti di e exigencia di Fiscal, pero a baha e 3 aña di prueba na 2 aña di prueba bou guia Reclassering.
DEMANDA NO ADMISIBLE
Pa cu e demanda di daño, Hues a bay check a base di ley con esaki mester sosode. Ley ta mustra cu Gobierno mester autoriza un persona pa haci demanda den nomber di Gobierno ya cu Censo ta un departamento di Gobierno. Esey no a sosode y pesey Hues ta declara e demanda di daño no admisibel.
Pa loke ta e medida di pago, Hues a rechaza esaki ya cu Gobierno lo por actua pa haya e placa.
DIARIO a papia cu e abogado mr. Emerencia riba e asunto aki y el a splica cu esaki ta un parti huridico y cu loke Hues a bisa ta asina. El a bisa cu e lo bay yama e departamento di Gobierno concerni pa yega na un areglo di pago pa su cliente. Asina ta evita cu Gobierno lo mester bay cuminsa un caso civil.
