ORANJESTAD (AAN): E homber G.P. di Venezuela biba na Aruba, a presenta dilanti Hues pa duna cuenta pa e delito cu Fiscal di Ministerio Publico ta acus’e di dje.
Ta asina cu G.P. a admiti di a maltrata e homber D. cu un bate di baseball, despues cu el a logra kita e bate for di D., kende a bay pa dal’e. Fiscal ta haya G.P. culpable y a exigi 10 luna di prison.
acusa cu riba 12 September 2021 a maltrata un persona homber D. cu bate di baseball na cabez y causa lesion grave. Subsidiario acusa di maltrato cu arma y intento maltrato severo.
MALTRATO
Fiscal a acusa G.P. cu riba 12 September 2021 el a maltrata e homber D. cu n bate di baseball na cabez y curpa y causa lesion grave. Subsidiario Fiscal a acusa G.P. di maltrato cu arma y intento di maltrato severo. G.P. a admiti di a dal D. cu un bate di baseball. El a bisa Hues cu el a bay busca su pañanan na e cas caminda su partner ta keda. Segun G.P., D. a saca un bate di baseball y dal G.P. G.P. a bisa Hues cu el a defende su mes y a logra kita e bate di baseball. El a sigui bisa cu D. e ora ey lo a dal’e cu un palo di kwihi y e ora ey G.P. a perde cabez y a dal D. cu e bate di baseball varios biaha. Hues a remarca cu ta promer biaha e ta tende G.P. ta papia cu D. lo a dal’e cu un palo di kwihi.
Hues a bisa cu segun e partner di GP. a declara na Polis, G.P. tabata kier pa e bay cun’e y a tene na su man pa bay cun’e. E partner a cuminsa grita pasobra e no kier bay y D. a bay coy un bate di baseball. Segun G.P. e no kier a keda biba eynan door di hopi problema cu D.
Hues a mustra cu e partner a bisa cu G.P. a keda maltrata D. cu bate di baseball aunke cu D. a cay riba suela. E partner a bisa cu el a tira santo den cara di G.P. pero G.P. a sigui maltrata. E ora ey el a bay para entre nan. G.P. a bisa Hues cu e ex partner ta gaña. Segun G.P., tanto su ex partner como D. tabata kier pa e bay sera.
Hues a bisa cu D. a sufri herida na cabez. E tabatin un man den gips. G.P. a bisa Hues cu e tambe tabata maltrata y Polis a saca potret.
EXIGENCIA FISCAL
Fiscal a bisa Hues cu e ta haya legalmente proba cu G.P. a maltrata D. cu un bate di baseball. Tin potretnan cu ta mustra con D. a wordo maltrata. Raport medico ta mustra cu D. a sufri fractura na man. G.P. mes a declara di a maltrata D. y pa defensa propio. Fiscal no ta haya cu por papia di defensa propio. Fiscal a mustra cu diferente biaha G.P. a bay na e cas pa busca su ex partner. Anochi el a forza su ex partner pa bay cun’e pero e ex partner a nenga. D. a pasa man pa un bate di baseball pa spanta G.P. pero G.P. a kita e bate di baseball y bati D. cu esaki. Fiscal a bisa cu e ta haya cu esaki ta un caso di maltrato severo. El a bisa cu G.P. tabatin suerte cu e caso no a bira mas serio. El a exigi 10 luna di prison di cual 3 luna ta condicional cu un tempo di prueba di 2 aña. Fiscal tambe a bisa cu e ta haya cu ta bon pa G.P. por bay bou guia di Reclassering. Fiscal a pidi pa destrui e bate di baseball.
ABOGADO
Mr. Kuster a bisa Hues cu no ta sigur kico exactamente a sosode e anochi ey. Hecho ta cu D. a agredi G.P. cu e bate y despues G.P. a dal D. cu e bate. G.P. a perde cabez y no sa con el a maltrata D. G.P. no a bay e cas cu intencion di maltrata hende. El a bay na e cas pa motibo di problema cu su partner. El a bay na e cas pa busca su pañanan. Na opinion di e abogado, G.P. a realisa cu el a haci malo.
Hues a sera tratamento di e caso y a bisa cu e ta bay studia e caso y dia 30 December 2021 9’or mainta lo tin sentencia.
