Zane Winterdal a sali pa Sunfish World Championship 2023 na Miami

ORANJESTAD (AAN): Diasabra di 2 di December 2023 e atleta velerista Arubano Zane Winterdal (18) a sali pa e Campeonato mundial di Sunfish 2023 na Miami.

E evento aki lo tuma lugar for di 3 pa 10 di December 2023 na Coconut Grove Sailing Club, Miami Dade County. E evento ta sanciona door di e International Sunfish Class Association ISCA) na unda Sunfish Club Aruba ta afilia.

   Recientemente Zane Winterdal a titula ganador di clasemento general 2023 di Sunfish Club Aruba, cu ta ensera un serie di caredanan mensual den e deporte velerista aki. Na segundo lugar a sali Richard van der Wal y na trecer lugar George Winterdal. Durante e ceremonia di premiacion na Surfside Beach Bar, Zane Winterdal tabata tin e honor di ricibi e copa rotativo “Ernest (Ernie) Kervel”. Kervel (q.e.p.d.) a presidi Sunfish Club Aruba pa hopi aña y a yega di organiza e campeonato mundial di Sunfish na Aruba tres biaha den década 1970’ y 1980’. 

   Na e ceremonia di premiacion aki tambe a otroga premio pa e campeonato di Sunfish Arubano 2023 cu a worde gana pa Richard van der Wal siguie pa Zane Winterdal (segundo lugar) y George Winterdal (trecer lugar). Van der Wal na e ocasión aki tambe a ricibi un obsekio rotativo cu ta un “daggerboard” cu plaachi ni nomber di tur ganador di e campeonato e ultimo 25 aña.

   Sunfish Club Aruba ta desea e atleta miembro Zane Winterdal tur clase di existo na e campeonato mundial, Sunfish Worlds 2023, na Miami.