ORANJESTAD (AAN): Den fin di siman, Rotary Club of Aruba a logra recauda casi 100 mil Florin pa yuda diferente organisacion, danki na e Torneo Anual di Golf cu nan ta organisa pa recauda fondo.
E evento mes a tuma lugar na Tierra del Sol Golf Resort, y e torneo di golf aki ta uno cu e organisacion di Rotary a start cune 24 aña pasa como un evento divertido pa miembronan cu ta golfista, y esnan no-golfista. Y el a crece y bira un evento cu participantenan no djis procedente di Aruba sino di exterior tambe.
E biaha aki un total di 23 ekipo a participa, y manera semper tabatin un deportivismo positivo y tur hende a pasa un atardi y anochi divertido.
Cu e torneo aki, un total di 100.000 Florin a wordo genera, danki na e sosten generoso di comunidad comercial di Aruba.
Durante e brindis na final di e torneo, Rotary Club of Aruba no a djis honra e ganadornan di e torneo, pero tambe a entrega cheque pa e suma na varios organisacion local caritativo.
Sigur un pabien na e ganadornan, y bon suerte na e instancianan caritativo local cu a ricibi e yudansa aki di Rotary Club of Aruba, via nan lema “Service Above Self”.
