Yegada spectacular di crusero Icon of the Seas na Miami

E ta esun mas grandi awor di mundo

• E por transporta 7.600 pasahero durante un viahe 

ORANJESTAD (AAN): Cayanan a lo largo di Biscayne Bay na Miami, y tur rond di e area di Port of Miami tabata yena cu hende pa asina a presencia e yegada di e barco crusero cu aworaki ta esun di mas grandi, esta ‘Icon of the Seas’.  E crusero di mas nobo di Royal Caribbean International ta preparando asina pa riba Diasabra 27 di Januari 2024 e debuta cu su viahe inaugural di 7-dia.

   Monton di fanatico di Royal Caribbean, como tambe fanatico tabata presente pa mira e residente di mas nobo di Miami.  Remolcadornan a ricibi e crusero cu e saludo di cañon di awa, y celebracion na Perez Art Museum pa marca yegada di e gigante aki. Di awor te cu 27 di Januari, nan lo keda haci preparacion pa asina ricibi e prome huespednan.

   Icon of the Seas lo haci viahenan pa Caribe henter aña largo, y lo alterna entre ‘Eastern Caribbean’ y ‘Western Caribbean’ cada siman.  Pa Eastern Caribbean e lo ta bishitando e.o. St. Maarten, St. Kitts, St. Thomas, y e isla Coco Cay na Bahamas.  Pa Western Caribbean e lo ta bishitando e.o. Isla Roatan (Honduras), Costa Maya (Mexico), Cozumel (Mexico), y Coco Cay na Bahamas.

   E barco ta nabega bao bandera di Bahamas, y a wordo construi na Meyer Werft na Turku, Finlandia.  El a bira e prome barco di e Clase Icon, y a costa 2 biyon Dollar pa construi.  E ta usa LNG Gas como combustible, y e motornan principal ta di Wartsila cu ta produci 67,5 MegaWatt di coriente.

   Su largura ta di 365 meter, hanchura ta 65 meter, y por nabega cu velocidad di 41 km/h.

   E crusero nobo aki tin capacidad maximo di 7.600 pasahero, y e tin 19 deck.  E tin total di 2.350 miembro di tripulacion.  Tin total di 12 deck cu camber, y e cantidad di camber abordo ta 2.805.  E barco tin mas cu 40 restaurant abordo.

   E barco Icon of the Seas a wordo bautisa door di e astro di futbol Lionel Messi.

   Ora di mira e barco, loke mas ta resalta mesora ta e gigantesco bentana dilanti na e barco, y cu ta ser yama ‘AquaDome’.  Full e glas grandi aki ta di un solo pida, cu ta 50 meter hancho, y 25 meter halto.  A dura 80 ora pa a hisa y instala e pida gigantesco di glas aki na e parti mas ariba di e barco.