Minister Dangui Oduber a anuncia un proyecto innovativo:
*Na banda di renovacion di ex-edificio DOW y di e Terminal di Crusero
ORANJESTAD (AAN) – Diahuebs 11 di Januari awo, Minister di Salud y Turismo a yama un rueda di prensa, cu a tuma lugar na Welcome Plaza, situa net otro banda di caminda di e edificio di ex-DOW.
Conhuntamente cu Director di Aruba Port Authority, señor Figaroa, e dignatario a anuncia un bunita proyecto di upgrading y embeyecimento di un plaza cu gobierno tin intencion di yame “Welcome Festival Plaza”.
Minister Oduber a expresa cu e maneho cu e ta hibando ta uno pa trece e turista afluente, di calidad, esun cu ta laga hopi placa atras den Aruba su economia, diversifica nos turismo, y percura pa haci inversionnan continuo den mehoracion y upgrading di embeyecimento producto Aruba, p’asina e keda competitivo.
Esaki ta cuadra cu e master plan cu Aruba Port Authority algun tempo atras y cu ta inclui e proyecto “Port City”, Barcadera Business Park, upgrading di e terminal di crusero, lo cumpra e ex-edificio di DOW un parti pa APA, y e otro parti lo bira un “Inspiration Center” cu lo wordo maneha pa ATA, y naturalmente e embeyecimento di e area unda e rueda di prensa a tuma lugar (Welcome Plaza).
E mandatario a señala cu esaki ta un proyecto di cual a wordo papia pa hopi tempo.
“Pa hopi tempo nos a prepara pa e proyecto aki, pa asina yega na un bunita diseño final, pa crea di e area aki un atraccion nobo, no solamente pa nos localnan pero tambe pa nos turistanan unda lo tin areanan pa recrea. Den dia tambe lo tin iluminacion, y lo tin landscaping. Un bez cu e proyecto aki wordo entrega, cu e keda cla, lo tin un area completamente nobo y embeyece cu lo fit tambe den e vision di e maneho cu nos ta hibando. Esaki ta e prome impresion cu nos turistanan crusero ta haya banda di e kiosconan cu a wordo construi algun aña atras”, Minister Oduber a bisa.
E dignatario a agrega cu parti di e proyecto aki no solamente ta, haci inversion den e “Welcome Festival Plaza”, sino tambe upgrade, drecha y embeyece e estetica di e kiosconan, pa asina tambe fit den e vision cu gobierno tin pa upgrade henter e area aki, ex-edificio di DOW, y tin den planning tambe y lo wordo anuncia e lunanan nos dilanti, e upgrade di e cruise terminal.
Oduber a splica cu na e momentonan aki, Aruba Port Authority a presenta e trabaonan aki na un compania p’a asina duna nan idea den ki direccion APA mester bay cu e terminal di crusero pa haci’e atractivo, innovative y asina por abarca e necesidadnan di e turistanan crusero. “E ta un proyecto cu ta canando lihe y nos ta spera cu e lunanan nos dilanti nos por presenta e prome diseñonan di construccion, p’asina, finalmente, APA por tuma un decision pa cuminza cu e inversion ey tambe”, Minister Otmar Oduber a señala.
