ORANJESTAD (AAN); Manera DIARIO a publica caba, Fundacion Registracion di Companianan di Construccion (RCC) riba prome di december 2021
a haci entrega certificacion di RCC na no menos cu 9 compania estableci na Aruba cu a pasa door di e proceso di certificacion di RCC.
RCC a worde funda cu e meta pa ofrece companianan afilia na e fundacion aki, e oportunidad di usa e logo di RCC pa demostra cu nan ta cumpli cu sierto exigencianan determina.
Cu e paso aki di a ricibi e certificacion di RCC, e companianan di construccion aki na Aruba por demostra cu nan ta (*) cumpli cu leynan y normanan local, (*) contribui na e economia di Aruba, (*) trata responsablemente cu nan personal y nan obligacionan relaciona cu esaki.
Ademas, e hecho cu un compania tin e certificacion RCC ta yuda e clientela na Aruba pa tuma decision mas confiabel y responsabel ora nan ta busca un socio adecuado pa nan necesidadnan pa proyectonan di construccion, ya cu seguridad durante e proceso di construccion of trabao ta importante.
Di parti di directiva di RCC, nan ta yama danki y pabien na cada un di e 9 companianan cu ya caba a haya nan prome certificacion, cualnan ta: Amast N.V., Bohama N.V., Pro-Frame N.V., Croon Elektrotechniek Aruba N.V., Prime Contractors, Arubaanse Wegenbouw N.V., BK Consult, Albo Aruba, y Constructiebedrijf Goede Bouw N.V.
