PHILIPSBURG: Ministro di Turismo na St. Maarten, esta Roger Lawrence a indica cu Gobierno hunto cu Port St. Maarten Group (PSG) ta reuniendo
cu tur stakeholder envolvi, y ta vigilando di cerca e potencial impacto di e conseho di US Center for Disease Control (CDC) pa cu viahenan crusero den 2022.
Siman pasa Diahuebs, CDC a anuncia cu nan a escala nan Notificacion di Salud pa Viahe riba Crusero, for di Level 3 te na Level 4, cu ta nan nivel di mas halto.
“Esaki ta un situacion hopi preocupante, y e tin henter atencion di Ministerio di Turismo. Nos ta aworaki colaborando cu Ministerio di Salud Publico pa revisa nos protocolnan di salud awor cu e situacion aki ta hopi instabil y ta cambia dia pa dia. E variante Omicron ta plamando rapidamente como cu e ta mas contagioso.”
Nan a crea un Grupo di Trabao di Crusero y ta trahando cerca cu e partnernan di industria crusero pa purba crea un formula cu ta funciona, pa asina por haci uso di dje pa nabega door di e retonan nobo aki den un forma cu lo garantiza seguridad di salud publico, y nos continuo recuperacion economico,” Ministro Lawrence a bisa.
Esnan cu ta atende Waf di St. Maarten, esta Alexander Gumbs cu ta CEO di PSG, a bisa cu nan ta trahando hopi cerca cu Ministro pa asina guia e recuperacion di sector crusero pa e isla. El a confirma cu un Grupo di Trabao a wordo lanta pa duna conseho, guia, y bin cu solucion basa riba desaroyo y cambionan den e sector internacional di crusero, specialmente relaciona cu region Caribense.
Durante un sesion di Conferencia cu Florida-Caribbean Cruise Association (FCCA) siman pasa, destinacion St. Maarten a wordo selecta como un di e cinco destinacionnan crusero grandi den Caribe pa forma un comision nobo den FCCA pa por traha riba un forma pa crea plan basa riba desaroyonan actual den e sector. Mas di 100 ehecutivo, director di Waf, y oficial di Gobierno a atende e reunion di emergencia aki cu FCCA a yama, y sosteni pa Cruise Lines International (CLIA).
Recien CLIA a emiti un boletin unda nan ta sorprendi cu ta pone tur spotlight riba e industria crusero atrobe. CLIA a bisa: “E decision di CDC pa hisa na Level 4 nan advertencia di viahe cu crusero ta asombroso, considerando cu e casonan identifica riba barconan crusero consistentemente ta forma un minoria chikito di e total di pasahero abordo, cu ta mucho menos cu riba tera.”
Algo cu companianan ta sinti tiki fastioso, ta cu algun isla y pais den Caribe ta tumando decision si acaso un barco crusero por mara of no na nan waf. Lo peor ta cu ta warda e barco drenta y mara, y despues di tur esey nan ta haya informacion cu ni pasahero ni tripulantenan no mag di baha. Esaki ta refleha masha negativamente riba e isla of paisnan ey.
Pasobra keto bay, esnan cu ta positivo abordo di e barconan aki, ta den isolacion (Royal Caribbean ta pone tur e pasaheronan ey den cambernan isola na Piso 3 di e barco). Pues e resto di pasaheronan cu no ta malo, so por keda cana rond.
St. Maarten anteriormente a calcula cu nan lo bay ricibi como 500.000 pasahero di crusero den e prome tres lunanan despues di Aña Nobo. Pero pa awor, esaki ta den duda.
