Xeena Dijkhoff di Noord a bira Aruba su Reina Infantil pa Carnaval 70

ORANJESTAD (AAN): Diasabra anochi faltando algun minuut prome cu 12’or di mey anochi a bati, Aruba a haya sa resultado di kende a bira ganadora di Eleccion di Reina Infantil y Hubenil di Carnaval 70.

   Den Categoria di Reina Infantil, e di 47 Reina Infantil a bira Xeena Dijkhoff, un mucha muher alegre, simpatico, energetico, y cu a balia sin stop den un bistir bunita representando Distrito di Noord.

   El a wordo corona door di Ministro di Cultura Xiomara Maduro, den presencia di President Darren van Ommeren di SMAC.

   Prome finalista a bira Ciara Winterdaal kende a representa Don Flip Carnival Group.  Segundo finalista a bira Savannah de L’Isle di Champagne Kids Carnival Group/Distrito Paradera.  Tercer finalista a bira Adelyne Thiel, di Little Diamonds Carnival Group.

   Ademas di e corona, Xeena Dijkhoff a bay cu e premio tambe di candidata mas popular, candidata cu mihor speech, y candidata cu mihor trahe di Carnaval.   Por nota cu Ciara Winterdaal a haya premio di mihor show.