FADA ta contento di a start sali cu programa nobo “Nix 18” y kier pa tur scol secundario hay’e

*Colegio Arubano ta e prome cu a cuminza

ORANJESTAD (AAN) – Rubiella Toppenberg, trahador preventivo di Fundacion Anti-Droga Aruba (FADA) ta contento di a start sali cu nan programa mas nobo yama: “Nix 18”.

            Den entrevista cu DIARIO, Rubiella a duna di conoce cu esaki ta un programa diseña specialmente pa hobennan bao di 18 aña di edad, kiermen nan grupo meta ta hobennan di scol secundario.

Colegio Arubano a book e prome “Nix 18” loke ta un privilegio y un exito cerca e hobennan, y por wak den e reaccion cu e tema ta yega cerca nan, pasobra ta conoci cu e uso di alcohol na Aruba ta un problematica, y pesey mirando loke FADA hunto cu Fundacion Zinnia tin, pa loke ta Amigo Didi, a crea e programa ariba menciona y nan ta hopi contento pa mira e prome resultadonan caba.

            Tocante un pregunta di DIARIO, cu durante Fakkel por a mira hopi hoben menor di edad consumiendo alcohol anto con nan ta deal cu esaki den nan programa, Toppenberg a expresa cu educacion ta cuminza na cas. Pero si na cas no tin esaki, ta motibo pa FADA drenta scol, pasobra si mayor no ta duna yiu informacion, anto por wak kico ta pasa riba caya.

            Tin mayornan cu ta duna nan yiunan informacion, pero ora nan ta subi caya e presion di grupo cu tin eyfo, e amistadnan cu nan ta den dje, por pone nan bebe alcohol. Pesey ta e importancia pa FADA haci un yamada na tur scol, pa asina nan yega cerca e muchanan cu ta e grupo cu ta consumi alcohol, pasobra nan a mira esaki den fakkel y por mir’e den diferente actividad rond di Aruba, cu tin mucho hopi hoben bebiendo.

            “Dus, pesey nos ta yega cerca e muchanan por medio di scolnan pa asina duna nan e informacion cu nan mester. Mi a caba di bisa un grupo eyfo cu na momento cu un persona haya informacion, e no por haci fout. Si e haci’e mes ta pasobra el a scoge p’e”, Rubiella a señala.

            FADA tin un plan pa brota den menos di un siman, pa nan por hiba e mensahe na mayoria caminda posible, y Rubiella a  haci un yamada na scolnan cu si ainda nan kier haya “Nix 18”, cu ainda por contacta FADA. E programa aki ta bay ta accesible henter aña pero nan ta den piek aworaki.

            Nan tin jingle na caminda, video clip, lo comparti esaki den tur medio social, pa asina yega cerca e hobennan.