Workshop pa empleadonan di Aeropuerto haya sa di e importancia di suelo sano y planta na cas

ORANJESTAD (AAN): Aruba Airport Authority NV siman pasa a celebra “Dia Mundial di Suelo” conoci como ‘World Soil Day’ (WSD). 

Esaki ta un celebracion anual di e Organizacion di Nacionnan Uni pa Agricultura y Alimentacion.

  WSD ta enfoca riba e importancia di suelo sano y ta aboga pa e maneho sostenible di recursonan di suelo.  Suelo y awa ta constitui e base di produccion di alimento, e ecosistemanan, y bienestar humano.

   Den e enfoke aki, e team di Salud, Seguridad y Sostenibilidad di Aruba Airport Authority (AAA) a organisa un workshop special hunto cu e grupo Living Soil Aruba pa crea concientisacion riba e importancia di bon calidad di suelo, pero lo mas importante pa duna empleadonan e chens pa siña mas riba e beneficionan, e mihor practicanan, y nan contribucion na flora local.

   E workshop a inclui informacion riba agroforestria sintropico cu ta consisti planta varios mata y planta den un espacio limita, cual ta e mihor practica pa sigui y fertiliza e suelo cu recursonan cu bo ta haya na cas mes, sin usa fertilizante comercial, y con pa test calidad di suelo.  Na final di e tayer, cada empleado a ricibi un regalo special cu e opcion pa escoge nan mata pa bay planta na cas.

   “AAA lo sigui organiza proyectonan impactante cu ta cuadra cu e SDG di Nacionnan Uni, manera Dia Mundial di Suelo pa concientisa y anima e empleadonan di Aeropuerto pa adopta practicanan sostenible, no djis na trabao pero tambe na cas, y asina fomentando un comunidad mihor y mas socialmente responsable pa tur hende,” ta loke Christine Leo a declara, kende ta Sustainability & Health Manager pa AAA.