Workshop nacional y introduccion oficial di Comision Nacional pa promove revalidacion na Aruba

Via di Ministerio di Salubridad, DVG y PAHO

• Implementacion di Plan Strategico pa Revalidacion y Medionan di Apoyo 

ORANJESTAD (AAN): Directie Volksgezondheid (DVG), den colaboracion cu Organizacion Pan Americano di Salud (PAHO/WHO) y cu apoyo di Ministerio di Salubridad, Asunto Social, Cuido di Adulto Mayor y Maneho di Adiccion, a organiza e workshop nacional “Strengthening Rehabilitation in Aruba: From Strategy to Action”. E encuentro a reuni stakeholders, profesionalnan di salud y partnernan strategico pa avansa revalidacion y cuido cu medionan di apoyo na Aruba.

   Durante e workshop, a presenta oficialmente e Comision Nacional cu lo guia e proceso di implementacion y coordinacion di e Plan Strategico pa Revalidacion y Medionan di Apoyo 2026–2030. Participantenan a intercambia conocemento, dialoga riba prioridadnan y accionnan necesario pa mehora coordinacion di revalidacion na Aruba.

   E Comision Nacional ta uni diferente actornan clave den sector di salubridad, incluyendo instancianan di salud, aseguronan medico, organizacionnan profesional y representantenan di personanan cu limitacion. Entre nan ta Directie Volksgezondheid (DVG), Uitvoeringsorgaan AZV (UOAZV), Dr. Horacio Oduber Hospitaal (HOH), Huisartsen Vereniging Aruba (HAVA), Aruba Vereniging van Fysiotherapeuten (AVF), Aruba Association of Medical Specialists (ASHA) y Plataforma pa Personanan cu Limitacion (PPL). Cada organizacion lo nombra su representante den e structura di colaboracion. E iniciativa aki ta representa un paso importante pa mehora coordinacion y colaboracion den sector di salubridad.

   Durante su discurso di apertura, Minister Mervin Wyatt-Ras a señala cu Aruba ta enfrenta un necesidad creciente pa servicio di revalidacion debi na envehecemento di e poblacion, aumento di malesanan cronico y impacto di condicionnan cu ta causa limitacion funcional. E Minister a enfatisa cu revalidacion mester wordo reconoci como un componente esencial di cobertura universal di salud y cu e ta parti integral di tur nivel di cuido.

   “Revalidacion no ta solamente cuido medico. Ta trata di independencia, participacion y calidad di bida. Cu e paso aki, Aruba ta sigui construi un sistema di cuido mas inclusivo, coordina y orienta riba e persona,” segun Minister Wyatt-Ras.

   E workshop a conta cu contribucion di diferente experto y representantenan tecnico cu a facilita presentacionnan y discusionnan durante e programa. Entre nan tabata Uginia Thomson y Judelca Briceño di DVG, hunto cu Dr. Michelle Harris y Dr. Gustavo Perez Reina di PAHO/WHO.

   Den colaboracion cu PAHO/WHO, Aruba ta sigui traha pa un sistema di salud resiliente, inclusivo y sostenibel, unda acceso, calidad y coordinacion di cuido ta keda central.