Fundacion JA IK ta traha pa fortalece famianan na Aruba pa medio di programanan pa hobennan

Jalken Antonia di Stichting JA IK Aruba:

ORANJESTAD (AAN): Jalken Antonia ta fundador di Stichting JA IK Aruba, un fundacion cu ta dedica na fortalece hobennan den nos comunidad, inspira crecemento personal y promove empoderamento na Aruba. Cu pasion pa yuda otro, e ta traha pa crea oportunidadnan pa desaroyo emocional, social, laboral y personal pa nos hobennan en especial. Su vision ta enfoca riba union, apoyo y motivacion pa hende logra nan potencial y contribui positivamente na sociedad. 

Den un entrevista recien cu DIARIO, señor Antonia a conta di e programa di e fundacion y con esaki ta yuda e hobennan cu ta participa. Den cooperacion cu Oranjefonds, Stichting Kinderpostzegels, CEDE Aruba, DAS y DPL, Fundacion JA IK ta traha pa fortalece famianan na Aruba pa medio di e programanan cu e fundacion ta ofrece. 

Actualmente, desde februari a cuminsa cu un curiculo nobo di 40 participante. Segun e, ta bisto cu un 70 porcent di e participantenan ya caba tin un mentalidad diferente. Nan ta pensa mas, analisa mas, reacciona di manera diferente. El a menciona cu dos hoben di e grupo aki ya a drenta mercado laboral  

Durante e prome parti di e programa ta focus riba training tres biaha pa siman entre otro riba liderazgo personal y etica laboral. Meta di e programa ta pa e hobennan no solamente haya trabou, pero pa mantene e trabou. Actualmente, nan ta haciendo bishita na diferente compania na Aruba. E hobennan ta parti den dos grupo, cada grupo ta bishita 9 compania pa asina nan wak e teoria den e praktijk y ta wak pa nan mes con tur cos ta hinca den otro manera nan ta wordo splica den e trainingnan cu nan ta haya. 

Señor Antonia a remarca cu e reaccionnan di e hobennan pa loke ta trata e programa ta hopi positivo na unda cu nan a realisa cu nan tabatin mester di e programa aki hopi prome. Un programa cu a cambia nan manera di pensa, ta guia nan stap pa stap pa asina nan yega na nan metanan.