Women’s Club of Aruba a lansa iniciativa ‘90 Mata pa 90 Aña’

Cu un Plantamento Simbolico di e prome mata…

ORANJESTAD (AAN): Riba 18 di september 2024, Women’s Club of Aruba (WCA) a inicia nan proyecto “90 Mata pa 90 Aña” en conexion  cu celebracion di su 90 aniversario sirbiendo nos isla. Cu un plantamento simbolico di e prome mata na Biblioteca Nacional Aruba, Arubiana/ Caribiana den Bachstraat kier enfoca riba mehoracion di Medio Ambiente na Aruba y pa laga un herencia duradero pa e generacion di futuro.

   E acto di plantamento no solamente ta simbolisa e raiznan firme cu WCA tin den nos comunidad, pero tambe su esfuerso continuo pa yuda nos medio ambiente. Durante e periodo di e directiva di 2024-2025, lo planta 90 mata na diferente luga riba Aruba.

   E evento a tuma luga den presencia di miembronan di WCA, y bishitanan distingui for di Washington, presidente Internacional di General Federation of Women’s Clubs (GFWC),

   Señora Suellen Brazil y presidente Electo Señora Wendy Carriker, famia di Señora Quita Croes (dfm), prome presidente local di WCA 1975 – 1976, famia di Señora Marie Thérèse Croes (dfm) Presidente WCA 1973 - 1974 / 1985 - 1986 / 1986 – 1987, Señora Astrid Britten, directora di Biblioteca Nacional Aruba, Señora Zetsia Ponson, BNA Dept. Arubiana/ Caribiana Coleccion Special  como tambe miembronan di Fundacion Ban Lanta y Planta.

   Durante su discurso di apertura, Señora Reina Geerman, presidente di WCA, a enfatisa e importancia di plantamento di mata local tanto como un simbolo di crecemento y sostenibilidad, como tambe pa enfatisa e compromiso di WCA pa cu Aruba. Nos tema di awe, “90 Mata pa 90 Aña, no ta solamente pa honra nos pasado, pero tambe pa inverti den futuro di nos isla stima”, Señora Geerman a expresa.

   E plantamento di e prome mata tabata posibel danki na un colaboracion cu “Ban Lanta y Planta” representa pa Señora Anita Mijts-Aerts, Señora Desiree Emerencia y Aruba Conservation Foundation, representa pa Señora Natasha Silva y miembro di WCA Señora Jan Oduber, kende a propone e iniciativa bunita aki. Señora Anita Mijts-Aerts a duna informacion valioso tocante e cuido y sostenibilidad di e mata di Aruba cu a planta durante e ceremonia na “Palo di Boonchi”. Tur mata cu lo planta ta matanan indigeno di Aruba.

   Pa finalisa, Señora Geerman a gradeci tur hende cu a contribui na e evento aki y a subraya e importancia di sosten di comunidad pa cu exito di e proyecto aki.