Encuentro di Nacionnan Uni atrobe ta exigi pa tene na realidad di bida
*Aruba a entrega prueba di loke gobernacion democratico ta produci
*Sumanan enorme pa cumbre mientras hamber y guera ta sigui mata
ORANJESTAD (AAN) — Durante ultimo dianan Nacionnan Uni a bolbe reuni pa atende cu e grado di miseria cu ta haci bida insoportabel na un gran parti di mundo.
Aruba tabata presente na e encuentro di e plan cu Nacionnan Uni a lanza na 2015 y cu mester culmina na 2030, ora un mundo perfecto a wordo logra.
Kico un mundo perfecto ta encera ta varia di e condicionnan di clima te na e tradicionnan di cada Pueblo cu mester wordo goberna.
Ora tira bista riba reportahenan mundial cu ta mira luz, ta mira cu hasta un pais rico manera Hulanda, conoci como pais cu hasta a crece na tamaño dor di conkista di tera cu tabata laman, tin problema te awe pa honra e puntonan cu mester wordo alcansa pa garantisa bienestar di hende na 2030.
Ta masha facil pa den un reunion mundial wordo determina, cu tur hende mester come tur dia, bebe awa limpi tur dia, mester bay school y mester tin proteccion contra abuso.
Pa esaki bira realidad di mester di introduccion di cuadronan di ley, cu Nacionnan Uni mester percura pa bira un hecho.
Pa un pais prospera y Pueblo ta feliz, mester di bon gobernacion. E resultadonan riba felicidad di hende na un pais, ta entrega e prueba si e pais conoce un bon gobernacion cu un base democratico, cu ta exigi pa bienestar di hende ta central den maneho di Gobierno.
Nacionnan Uni a nace for di e necesidad pa mundo conoce paz.
Tin dos forsa cu ta destrui e esencia di paz. Uno ta desastre natural, cu hende no por evita pero si por alivia, y desastre cu hende mes ta crea.
E cambio di clima ta un desastre natural pero tambe ta resultado di hende, cu den su afan materialista y falta di vision, a considera progreso solamente un realidad, den cual e hende tin placa pa gasta sin limite.
Cambio di clima a acelera e grado di problemanan cu naturaleza ta produci awor y ta afecta bienestar di hende den mas desastre natural cu hende mester enfrenta di calor excesivo te tormentanan mas destructor cu nunca.
Awe hende mester tuma medida pa drecha loke el a afecta na naturaleza pero tambe cuminsa realisa cu mal gobernacion ta un elemento mas destructor cu desastre natural.
Nacionnan Uni ta faya den loke hende tin den su man pa percura pa un mihor mundo, cu ta pone fin na guera y abuso di dictadornan cu ta horta di hende e posibilidadnan cu bida ta entrega tur hende pa sobrevivi.
Pa soluciona e grado creciente di poblacion mundial cu tin hamber, cu no tin un cas, cu no tin trabou, cu ta muri sin problema di salud pero pa motibo di armanan cruel di guera, Nacionnan Uni mester bira realmente Nacionnan Uni den cual ta tuma sancionnan directo y pisa pa destructornan di hende y bienestar di hende.
Nacionnan Uni mester cuminsa actua contra ladronnan di e bienestar di hende, cu ta causa guera y destructor.
Kico un bom ta haci cu medio ambiente? Kico e ta laga atras pa hende y henter mundo den aire?
Aruba na 2024 ta entrega na Nacionnan Uni e prueba kico un gobierno democratico ta produci pa un Pueblo, cu mester tene realidad su dilanti.
Empleo y leynan social pa esnan cu no por traha y produci nan propio entrada, ta e base pa calidad di bida di hende.
Gobierno di Aruba por a presenta na 2024 como ehempel na Nacionnan Uni, entregando e resultadonan cu el a alcansa pa asina tin trabou y por duna asistencia basico necesario na tur miembro di comunidad cu pa motibo legitimo, manera enfermedad of edad, no por haci esaki.
Educacion na Aruba ta na un nivel sumamente halto loke ta haci cu e hende tin e herment pa e progresa.
Aruba a baha gastonan di Gobierno pa haya placa pa gasta na asuntonan importante di Pueblo y no conoce gobernantenan cu ta uza placa di Pueblo pa nan por haci y deshaci manera nan kier.
Nacionnan Uni mester cuminsa actua pa husticia cu ta solamente posibel ora e bienestar di hende ta central.
Pa esaki ta posibel, Nacionnan Uni mester introduci sancionnan pisa contra paisnan cu ta crea condicionnan di guera. Contra gobernantenan cu ta trapa riba democracia y ta hasta asesino.
E plannan di Nacionnan Uni pa un mundo perfecto ta di aplaudi. Pero pa e mundo aki bira algo cu tin aparencia di perfeccion, mester di gobernacion capaz y democratico, cu ta entrega na hende e puesto mas importante: cu ta bienestar di un comunidad y su ciudadanonan manera Aruba a logra cu un gobernacion cu ta ehempel pa henter mundo!
