Gino Goeloe ta splica:
ORANJESTAD (AAN)—Den entrevista cu DIARIO, director di Wit Gele Kruis, señor Gino Goeloe, a splica con WGK ta yuda y sigui yuda comunidad, den diferente circunstancia.
PASHENT DI ALZHEIMER:
Gino Goeloe a duna di conoce cu nan tin 89 pashent di Alzheimer, y WGK ta cuida nan mas tanto posible, cu e pashentnan aki por keda den nan hogar.
PROYECTO CUIDO OIDO:
Gino Goeloe a menciona cu na aña 2007, WGK a bin cu un proyecto di cuido di oido di recien naci, unda cu e babynan cu a nace desde 2007, ya cinco pa dies dia despues di nan nacemento, por a test nan oido.
E tempo ey, un proyecto cu a cuminza na 2005 a wordo concretiza na 2007, y nan a trece Aruba e persona cu a coordina e proyecto na Hulanda, a forma un comision, y aworaki danki Dios na dicho proyecto no tin mucha sordo mas na Aruba.
“Esey ta algo cu WGK a zorg cu ne na Aruba, conhuntamente cu FEPO, Hospital, specialistanan di Hospital di Mucha, Zusternan, pues un team work, pa awe ora nan wak cu un mucha tin algo na su oido, ya caba ta bay den un comision cu ta bay zorg pa e muchanan aki haya e guia profesional, y nan ta haya un implant p’asina aki nan por scucha. Algo bunita cu hunto cu su partnernan, WGK a logra pa Aruba, cu mi ta kere ta algo masha grandi mes”, Gino Goeloe a señala.
PROGRAMANAN DIABETES Y OBESIDAD:
Goeloe a sigui bisa cu na 2008, WGK a actua cu e casonan di Diabetes y Obesidad, etc., unda a bin cu programanan na television pa educa nos hendenan pa biba cu diabetes, biba sin obesidad, biba sin problemanan cardiovascular. Esaki cu ayudo di Aruba Way Foundation y varios club di servicio, entre otro Kiwanis Club Aruba, Quota Club, Rotary Club. Kiwanis Palm Beach, tur cu a yuda pa awe a educa nos hendenan pa nan biba un bida saludable.
MAYOR FIRME:
Goloe a relata cu na 2011 WGK a bin cu un proyecto cu yama ‘Mayor Firme’, pa mayornan cu tin necesidad di guia profesional na cas. “Un proyecto cu a bin for di Hulanda pa Aruba, p’asina aki nos por guia e pashent (p.e adicto) conhuntamente cu su casa, pa nan por guia e baby ey di e miho manera posible, cu lastima cu aworaki nos tin’e solamente na Playa y na San Nicolas. Algo cu nos kier expande den tur distrito, pasobra tur distrito mester di un profesional specializa den mayor. Algo cu nos ta keda boga p’e y ta bin den tur nos presupuesto, pa nos por expande y coi e problema na su raiz. Si nos wak cu e mayor tin problema di adiccion na droga of alcohol, con e por guia e baby ey? Nos di WGK ta para pa yuda y sigui yuda”, Gino Goeloe a indica.
