ORANJESTAD (AAN) – Parlamentario Raymond Kamperveen, di fraccion di RAIZ, a declara den entrevista cu DIARIO cu den aña 2024,
mescos cu a sosode na 2023 cu mester a haci cierto ahustenan, por ehemplo BBO na frontera, etc., pero aña 2024 ta e aña pa duna bek na pueblo, pues con por yuda pueblo y den e caso aki sigur, e adultonan mayor.
Kamperveen a bisa cu su persona, como parti di fraccion di RAIZ a presenta dos mocion. E prome mocion ta trata e hecho cu tin hopi hende cu tin solamente pensioen di SVb como entrada, y te cu awo tin cu yena papel di belasting, locual e no ta haya na su lugar. El a pidi pa saca nan for di e sistema pa nan no mester yena papel di belasting mas, pasobra hopi di nan, nan salud mental di yena e papel ey so, ta haci nan malo.
E di dos mocion ta con pa sondea e posibilidad pa nos grandinan di 80 aña bay ariba. “Hopi di nan ta saludable, danki Dios, pero hopi di nan no ta saludable, y tur nan pensioen (tin ta haya dos) ta bay pa nan salud, y e ta keda caro pa straño cu por sona. El a trece e mocion si gobierno por sondea e posibilidad di exonera e grandinan aki di yenamento di papel y tambe pa inkomstenbelasting pa no mester paga mas, pasobra nan placa nan por inverti’e den nan mes salud, y pa paga remedi y cumpra productonan necesario den supermercado, y asina hisa nan poder di compra un tiki mas.
El a trece dilanti cu e aña aki e pensionadonan a haya un aumento chikito di pensioen, pero e no ta ahusta su mes manera mester ta. Pues mester busca otro posibilidadnan pa nos adultonan mayor, cu a paga belasting caba pa mas di 40 aña, cu nan a paga caba pa nan mes y awo ta pagando pa otronan. Un pregunta cu e pensionadonan ta keda haci ta pakico nan tin cu sigui pasa esaki.
