WEB cu varios donacion na ocasion di groundbreaking pa e tanki nobo na Alto Vista

ORANJESTAD (AAN): Dia 24 di november a tuma lugar un evento na e lugar di Tanki di Alto Vista pa conmemora e fase di construccion di e tanki di awa nobo.

E proyecto di ‘Tanki Alto Vista’ ta forma parti di WEB Aruba NV su proyecto ‘Upgrade Aruba Water Distribution Network;’ un proyecto grandi cu ta encera renobacion di tankinan, pomp y tuberia rond nos isla, pero tambe den planta di WEB.

   E construccion di un tanki di awa nobo na Alto Vista ta forma parti di WEB Aruba su plan pa construi un tanki nobo cu un capacidad mas grandi, traha di material mas sostenibel.

   Reemplaso di e tanki di awa ta necesario pa por keda suministra awa di bebe di calidad den area di Noord, awor y den futuro.

E tanki nobo lo tin un capacidad di 18800 m³ (6500 m³ mas cu esun bieu) y lo garantisa un suministro regular di awa pa e demanda creciente den e area di Noord. Na november 2022 WEB a inicia cu e desmantelacion di e tanki di awa bieu. E desmantelacion tabata exitoso y a sigui cu preparacion di construccion di e tanki nobo. Construccion di e tanki di awa nobo ta premira pa keda cla na november 2024. E proyecto aki tin un costo total di 19 miyon Florin.

   Construccion den fase: E contratista principal pa construccion di e tanki di awa nobo ta Florida Aquastore en colaboracion cu expertonan di WEB. Lo sigui cu ehecucion di e construccion den diferente fase y WEB manera ta custumbra, lo sigui avisa via media e inicio di cada fase.

   E atardi aki, e CEO di WEB Aruba N.V., Sr. Alfredo Koolman, representante di Florida Aquastore Sr. Nick Hartofilis, Minister di Energia, Labor y Integracion Sr. Glenbert Croes a hiba palabra durante e ceremonia. Invitadonan presente na e ocasion aki tabata Presidente di Parlamento Sr. Edgard Vrolijk, miembronan di Parlamento, Raad van Commissaris di WEB Aruba N.V., representantenan di Utillities Aruba, SIWA, SV WEB, VWI, coleganan, contratistanan, prensa y demas invitado.

   Durante e ceremonia a gradici e area di Alto Vista pa nan comprension y a pidi disculpa pa tur inconveniencia cu e proyecto ta trece cu ne pa habitantenan den bisindario. A extende un palabra di danki y exito na team di expertonan di WEB Aruba y tambe na e teamnan di Florida Aquastore y tur otro envolvi.

   Bunita Donacion: Como muestra di aprecio y pa celebra inicio di proyectonan nobo, WEB durante e ceremonia a haci donacion di Afl. 5.000,- na Bubali Voetbal Team, National Voetbal Team Hubenil, CBN Eagles Baseball Team, Hammer Shark Baseball Team, y Kinderhuis Imeldahof, pa asina contribui na un comunidad sostenibel.

   Ademas, contratista principal ‘Florida Aquastore,’ a haci un donacion di 2.900 Dollar na e fundacion local, Ban Uni Man pa Cria nos Muchanan, pa contribui na alimentacion saludabel na muchanan cu ta bay scol sin algo di come.

Aprecio pa nos clientenan y coleganan

   Como aprecio na nos clientenan, WEB a saca 18 nomber di clientenan for di un sistema automatico. E 18 clientenan aki a ricibi un Gift Certificate di awa na balor di Afl. 100. E gift certificates a worde entrega na WEB den un ambiente festivo door di coleganan di Customer Service. E 18 clientenan a keda masha contento cu nan regalo. Ademas di e evento special pa clientenan cu a tuma lugar, manera custumbra, WEB a mustra aprecio tambe na su empleadonan y contratistanan.